خاتوو کوێستان محەمەد: " پڕۆژەکە خزمەتێکی گەورە بەگەنجانی ناحیەی شۆڕش دەکات و لەڕێگەیەوە خولی گرنگی جۆراوجۆر بۆ گەنجان دەکرێتەوە تا ببنە خاوەنی کاری خۆیان"

ئەمڕۆ یەکشەممە، 4ـی حوزەیرانی 2023 ، بەڕێز خاتوو کوێستان محەمەد ، وەزیری کارو کاروباری کۆمەڵایەتی سەردانی قەزای چەمچەماڵی کرد.

سەرەتا بەڕێزیان قائیمقامیەتی قەزاکەیان بەسەرکردەوەو بەڕێز ڕەمەک ڕەمەزان قائیمقامی قەزای چەمچەماڵ پێشوازی کران و لە دانیشتنێکدا گفتوگۆ لەسەر ژمارەیەک لەگرفتەکانی قەزاکە کران.

دواتر وەزیری کار و کاروباری کۆمەڵایەتی سەردانی ناحیەی شۆڕشی کردوو بە ئامادەبوونی بەڕێزان دکتۆر هەڵەت ڕەشید سەرۆکی زانکۆی چەرموو و ڕەمک ڕەمەزان قائیمقامی چەمچەماڵ و مەریوان بەگۆک بەڕێوەبەری گشتی کار و دەستەبەری کۆمەڵایەتی و یادگار ساڵەح بەڕێوەبەری ناحیەی شۆڕش و بەرزان کەریم بەڕێوەبەری چاودێری و گەشەپێدانی کۆمەڵایەتی چەمچەماڵ ، سەنتەری ڕاهێنانی پیشەیی لە ناحیەکە کردەوە.

وەزیری کار و کاروباری کۆمەڵایەتی لەوتەیەکدا سوپاسی هەریەک لە قائیمقام و بەڕێوەبەری چاودێری و گەشەپێدانی کۆمەڵایەتی و هەموو ئەو کەسانە کرد کە هاوکاربوون و کارئاسانیان کردووە بۆ کردنەوەی ئەم سەنتەرە لەناحیەی شۆڕش، ڕاشی گەیاند " پڕۆژەکە خزمەتێکی گەورە بەگەنجانی ناحیەی شۆڕش دەکات و لەڕێگەیەوە خولی گرنگی جۆراوجۆر بۆ گەنجان دەکرێتەوە تا ببنە خاوەنی کاری خۆیان"

لە سەنتەرەکەدا بەشێوەیەکی بەردەوام خولەکانی بەرگدورین و سەرتاشی و کۆمپیوتەر و کارەبا و چاککردنی مۆبایل و ئاسنگەری و دارتاشی دەکرێتەوە و فێرخوازان ڕادەهێنرێن و دواتر هاوکاری دەکرێن بۆ ئەوەی ببنەخاوەنی کاری خۆیان.