گفتوگۆیەکی کراوە لەسەر پاراستنی مافی منداڵان لە میدیاکاندا بەڕێوەچوو.
بە مەبەستی پاراستنی مافەکانی منداڵان لە میدیاکاندا و دۆزینەوەی چارەسەرێکی گونجاو ، ڕۆژی شەممە، 20ـی ئـایـاری 2023، ڕیکخراوی منداڵپارێزی کوردستان بە هەماهەنگی سەنتەری میترۆ و ڕێکخراوی بەدیل لە هۆڵی هۆتێل ڕامادا ، بە ئامادەبوونی نوێنەری بەڕێوەبەرایەتی گشتی چاودێری و گەشەپێدانی کۆمەڵایەتی سلێمانی و ژمارەیەک لەدەزگا حکومی و ناحکومی و ڕێکخراوەکانی تایبەت بەپاراستنی منداڵان و کەسایەتی سیاسی و نوسەران، گفتوگۆیەکی کراوەی ڕێکخست.
هێمن محەمەد ، بەرپرسی ڕاگەیاندنی بەڕێوەبەرایەتی گشتی ، پاش دەستخۆشی لە ڕێکخراوی منداڵپارێزی کوردستان کە هەمیشە شانبەشانی وەزارەتی کار و کاروباری کۆمەڵایەتی وەستاوە لە پرسەکانی منداڵاندا ، ڕێبەرێکی میدیایی بەهێزی بۆ پاراستنی منداڵان لە میدیاکاندا بەگرنگ زانی و هەروەک پشتیوانی بەڕێوەبەرایەتی گشتی بۆ هەر هەوڵێکی لەوجۆرە دووپات کردەوەو داوای کرد میدیاکان دوور بکەونەوە لە پێشێل کردنی مافەکانی منداڵان و لەئەگەری پێشێلکاریشدا پێویستە لێپێچینەوە هەبێت.
لەبەشێکی تری گفتوگۆکەدا هێمن محەمەد وتی: " بەڕێوەبەرایەتی گشتی بەڕێبەرێک کاری میدیایی لە ماڵەکانی منداڵان و کوڕان و کچانی نەوجەواندا ڕێکخستووەو ڕێگەی لە بوونی هەر پێشێلکاریەک گرتووە کە دژ بە سودمەندانی بێت " پاشان ژمارەیەک لە خاڵەکانی ڕێبەرەکەی بۆ ئامادەبووان ڕوون کردەوە.
دواتر ئامادەبووان گفتووگۆی زیاتریان لەسەر بنەمای رێبەرێک لەکاتی ئامادەکردنی راپۆرتی راگەیاندن سەبارەت بە منداڵ کرد و سەرنجی خۆیان لەسەر بابەتەکە خستە ڕوو.
|