بە پێی فەرمانێکی کارگێڕی، کە ژمارە (٥٠١)ی لەسەرەو ڕۆژی (٢٥ی ٨ی ٢٠٢٠) دەرچووە، بەڕێوەبەرایەتی گشتی چاودێری و گەشەپێدانی کۆمەڵایەتی سلێمانی، بڕیاریدا دایەنگە حکومییەکان دەست بە دەوام بکەنەوە، و هەر لە فەرمانەکەدا ژمارەیەک مەرجیش بۆ وەرگرتنى منداڵ و کارکردنى دایەنگەکان دەستنیشان دەکات.
بە پێی فەرمانەکە، ڕۆژی (١ی ٩ی ٢٠٢٠) تا (١٠ی ٩ی ٢٠٢٠)، دەستنیشانکراوە وەک ڕۆژی تۆمارکردن‌و ئامادەکاری بۆ کردنەوەی دایەنگەو ڕۆژی (١٢ی ٨ی ٢٠٢٠) یەکەم ڕۆژی دەوامی ئاسایی دەبێت.
دەقی فەرمانەکەی بەڕێوەبەرایەتی گشتی شەش بڕیار لەخۆی دەگرێت کە بریتین لە:
١ـ لە (١/٩/٢٠٢٠) تا (١٠/٩/٢٠٢٠) تۆمارکردنی ناوی منداڵان و ئامادەکاری بۆ دەستپێکردنەوەی کارو چالاکییەکان، و لە(١٢/٩/٢٠٢٠) دەوامی ئاسایی دەست پێدەکات.
٢ـ هەر دایەنگەیەک لە توانای خۆی زیاتر داواکاری وەرگرتنی منداڵی لەسەر بوو، ئەوە بۆ ئەو منداڵانەی یەکەمجاریانە لە دایەنگە وەربگیرێن و پێش کۆرۆنا تۆمار نەبوون، پێویستە دایەنگە تیروپشکیان بۆ بکات ئەوەش بە شێوەیەکی ڕوون و بە ئامادەبوونی نوێنەری یاسایی و دایک و باوکی منداڵ، وەک ساڵانی ڕابردوو.
٣ـ دایەنگە تۆمارێکی دەبێت بە ناوی (تۆماری چاوەڕوانی) بۆ ئەو منداڵانەی کە لە خاڵی (٣)و بەهۆی تیروپشکەوە وەرناگیرێن و لە کاتی چۆڵبوونی شوێن بەهەر هۆکارێک منداڵێک لە جێگەی دادەنرێت بە پێی مافی شایستەی خۆی.
٤ـ بۆ خۆپارێزی لە پەتای کۆرۆنا، پێویستە بەڕێوەبەرو سەرجەم ستافەکان پابەندبن بە ڕێنماییەکانی دەرچوو لە وەزارەتی تەندروستی و لایەنە پەیوەندیدارەکان.
٥ـ بۆ وەرگرتنی منداڵ پێویستە دایکی منداڵ فەرمانبەری حکومەت بێت یان لە کەرتی تایبەت بە شێوەی بەردەوام کار بکات، ئەوەش بە پێی بەڵگەنامەی ڕاستێنراو.
٦ـ پابەندی تەواو بە سیستم و ڕێنماییەکان بۆ ڕەخساندنی ژینگەیەکی گونجاو بۆ گەشەی منداڵ.
لە سنوری کاری بەڕێوەبەرایەتی گشتی (١١)دایەنگەی حکومی هەیە کە دەکەونە ناوشاری سلێمانی و قەزاکانی دەوروبەری‌‌و ئیدارەی ڕاپەڕین و منداڵان لە قۆناغی یەک ساڵی بۆ چوار ساڵی لە خۆ دەگرن.