به‌ڕێوه‌به‌ری گشتی به‌دواداچوون بۆ ژه‌مه خواردنی ماڵه‌كانی به‌ساڵاچووان‌و منداڵان ده‌كات
ڕۆژی دووشه‌ممه، 17ی 8ی 2020، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی سلێمانی به هاوڕێیه‌تی هه‌ریه‌كه له به‌ڕێزان گه‌شاو عومه‌ر، شاره‌زای دارایی‌‌و نوخشه ڕه‌سوڵ، به‌ڕێوه‌به‌ری كارگێڕی دیوان‌و ڕێبوار ڕه‌سوڵ، به‌رپرسی به‌شی یاساو ژیار جه‌لال، به‌ڕێوه‌به‌ری چاودێری كۆمه‌ڵایه‌تی سلێمانی، سه‌ردانی چێشتخانه‌ی ماڵی به‌ساڵاچووانی سلێمانی‌‌و ماڵی ساوایانی كردو له نزیكه‌وه به‌دواداچوونی بۆ ژه‌می خواردنی نیوه‌ڕۆو خواردنی ژه‌مه‌كانی تری به‌ساڵاچووان‌و منداڵان كرد.
له‌و به‌دواداچوونه‌یدا، به‌ڕێز به‌ڕێوه‌به‌ری گشتی‌‌و شاندی هاوڕێی له بڕو چۆنیه‌تی‌‌و ته‌ندروستی ژه‌مه خواردنه‌كانی كۆڵیه‌وه‌و ڕێنمایی ستافه‌كانی كرد به چاودێری وردی هه‌ر ژه‌مه خواردنێكی ئاماده‌كراوو چاودێری‌‌و سه‌رپه‌رشتی وردی كاره‌كانی كۆمپانیای ئاماده‌كاری خواردن، ئه‌وه‌ش له پێناو دڵنیابوونه‌وه له پێشكه‌شكردنی خواردنی ته‌ندروست‌و بڕو جۆری پێویستی خواردن بۆ منداڵان‌و به‌سالاچووان، به‌جۆرێك یارمه‌تی گه‌شه‌و ته‌ندروستیه‌كی باشیان بدات.
جێی ئاماژه‌یه به‌ڕێوه‌به‌رایه‌تی گشتی له ڕێگه‌ی گریبَه‌ستێكه‌وه كاری ئاماده‌كردنی خواردنی بۆ ماڵه‌كانی منداڵان‌و به‌ساڵاچووان‌و ژنانی داڵده‌دراوی به كۆمپانیا ڕێكخستووه‌و ئه‌ركی چاودێریكردنیشی سپاردووه به به‌رپرسی ماڵه‌كان‌و لیژنه‌كانی سه‌رپه‌رشتی خواردن له ماڵه‌كان له پێناو پێشكه‌شكردنی بڕو جۆری خواردنی پێویست بۆ ته‌ندروستیه‌كی باشی سودمه‌ندان.
|