خشته‌ی نوێی خواردن بۆ دایه‌نگه ناحكومییه‌كان بۆ ساڵی 2017
به‌شی دایه‌نگه‌كان له به‌ڕێوه‌به‌رایه‌تی گشتی له ڕێگه‌ی نووسراوێكی فه‌رمییه‌وه خشته‌یه‌كی نوێی خواردن ئاراسته‌ی دایه‌نگه ناحكومییه‌كان ده‌كات كه پێویسته له 1ی 3 تا 31ی 12ی 2017 ه‌وه جێ به‌جێبكرێت.
له‌باره‌ی خشته نوێیه‌كه‌وه، كه‌نار شوكر، به‌رپرسی به‌شی دایه‌نگه‌كان به وێبسایتی به‌ڕێوه‌به‌رایه‌تی گشتی ڕاگه‌یاند:" بۆ ئاماده‌كردنی ئه‌م خشته‌یه، سودمان له خشته‌ی خواردنی دایه‌نگه حكومییه‌كان وه‌رگرتووه، هه‌روه‌ها بۆچوونی شاره‌زایان له به‌ڕێوه‌به‌رایه‌تی گشتی‌‌و پاشان له ڕێگه‌ی كۆبوونه‌وه‌یه‌كی ڕاوێژكارییه‌وه به ئاماده‌بوونی جێگری به‌ڕێوه‌به‌ری گشتی بۆ كاروباری هونه‌ری‌‌و نوێنه‌ری دایه‌نگه ناحكومییه‌كان‌و به‌شی دایه‌نگه‌كان ئه‌م خشته‌یه ئاماده‌كراوه".
سه‌باره‌ت به ئه‌و بنه‌مایانه‌ی ڕه‌چاوكراون له دانانی خشته‌كه‌دا، ئه‌و به‌رپرسه‌ی به‌ڕێوه‌به‌رایه‌تی گشتی وتی:" سیستمێكی خواردنی ته‌ندروست‌و گونجاو بۆ گه‌شه‌ی منداڵ‌و خواستی خێزانه‌كان ئه‌و بنه‌مایانه‌ن كه ڕه‌چاوكراون له دانانی خشته‌كه‌دا"، سه‌باره‌ت به جێ به‌جێكردن‌و به دواداچوونیش، كه‌نار شوكر وتی:" له زیاد له ڕێگه‌یه‌كه‌وه چاودێریی جێ به‌جێكردنی ده‌كه‌ین به‌تایبه‌ت له ڕێگه‌ی لیژنه‌ی سه‌رپه‌رشتی دایه‌نگه‌كانه‌وه، هه‌روه‌ك هه‌ر بۆچوونێكیش هه‌بێت كه بابه‌تییانه بێت له خزمه‌ت منداڵدا وه‌ریده‌گرین‌و گۆڕانكاری تێدا ده‌كه‌ین".
سه‌باره‌ت به بڵاوكردنه‌وه‌شی له ڕێگه‌ی سایتی فه‌رمی‌‌و په‌یجی به‌ڕێوه‌به‌رایه‌تی گشتی له تۆڕی كۆمه‌لایه‌تی فه‌یس بووك، به‌رپرسی به‌شی دایه‌نگه‌كان وتی:" بڵاوكردنه‌وه‌ی له پێناو ئاسان وه‌گرتنی له‌لایه‌ن دایه‌نگه‌كان‌و له‌لایه‌كی تره‌وه بۆ ئه‌وه‌ی دایكان‌و باوكان بزانن منداڵه‌كانیان له دایه‌نگه چی ده‌خوات‌و هه‌روه‌ها بۆچوونی ئه‌وان‌و هه‌ركه‌سێكیش كه شاره‌زایی هه‌بێت بزانین‌و ئه‌گه‌ر بۆچوونێكی تایبه‌تیان هه‌بێت بۆمانی بنێرن تا خشته‌ی خواردنه‌كه بگه‌یه‌نینه ئاستێكی زۆر باشی ته‌ندروست ".
|