"لەشەش مانگی سەرەتای ئەمساڵ دا لیژنەی بەدواداچوونی منداڵان (1611)سەردانی بۆ باڕو کافتریاو چێشتخانەو بلیارد و ساڵۆن و کارگەو کافیەکان و ئەوشوێنانەی گومانی تێدا دەکرێت منداڵی خوار 18 ساڵی تێدایە کردووەو 5 جێگە داخراون"

ئەمڕۆ سێشەممە ، 12ـی حوزەیرانی/2025 ، بەڕێوەبەرایەتی گشتی ئاماری بەدواداچونی لیژنەی بەدواداچونی منداڵانی ئیشکەری لە سەرشەقامەکان و ترافیکلایتەکان بڵاوکردەوە.

ژیلوان عادل شکور بەڕێوەبەری گشتی چاودێری و گەشەپێدانی کۆمەڵایەتی لەپارێزگای سلێمانی بەوەکالەت، بە سایتی فەرمی بەڕێوەبەرایەتی گشتی (www.socialsuli.com)ڕاگەیاند ، "لیژنەی بەدواداچوونی منداڵان لە شەش مانگی ساڵی 2025دا (1611) سەردانی بۆ فولکەو جادەکانی مەرکەزی سلێمانی کردووەو کە باڕو کافتریاو چێشتخانەو بلیارد و ساڵۆن و کارگەو کافیەکان و ئەوشوێنانەی گومانی تێدا دەکرێت منداڵی خوار 18 ساڵی تێدایە دەگرێتەوە، بەوهۆیەوە 5 شوێنی کارکردن داخراون و پسوڵەی سەرپێچی بۆ 9 جێگەش کراون، لەکۆی ئەو سەردانانە ( 257) منداڵی ئیشکەر لەسەر شەقامەکان ڕەسد کراون.

بەڕێوەبەری گشتی وتیشی " سەردان و بەدواداچونەکان بە هاوکاری هەریەک لە ڕێکخراوی منداڵپارێزی کوردستان و هۆبەی پۆلیسی نەوجەوانان وبەرێوەبەرایەتی کاری سلێمانی و بەچاودێری قائیمقامیەتی مەرکەزی سلێمانی بووەو سوپاسیان دەکەین کە پاڵپشتی گەورەن لەو ئەرکەداو هیواخوازین لە ئایندە دا پێکەوە بتوانین منداڵان لەسەر شەقام و شوێنە نەشیاوەکان دوور بخەینەوە و لە قوتابخانەو سەنتەرو شوێنە شیاوەکانی تایبەت بە منداڵان نەوەیەکی بەسود بۆ کۆمەڵگا بەرهەم بهێنرێ"