سلێمانی / نەخۆشخانەیەکی تایبەت بە ئافرەتانی بەخشراو کرایەوە.
خاتوو کوێستان موحەمەد :- "یەکەمین نەخۆشخانەی تایبەت بە ژنانی بەخشراومان کردەوە و لە ماوەیەکی نزیکدا لە پارێزگاکانی هەولێر و دهۆکیش دەیکەینەوە"
ئەمڕۆ پێنجشەممە ، 16ـی ئایاری 2024، بە ئامادەبوونی بەڕێزان خاتوو کوێستان موحەممەد وەزیری کارو کاروباری کۆمەڵایەتی ، د.سامان بەرزنجی وەزیری تەندروستی، د.هەڤاڵ ئەبوبەکر پارێزگاری سلێمانی ،بێستون جەبار بەڕێوەبەری گشتی چاودێری و گەشەپێدانی کۆمەڵایەتی لە پارێزگای سلێمانی ،د.صەباح هەورامی بەڕێوەبەری گشتی تەندروستی سلێمانی نەخۆشخانەی دەروونی (چرا) بۆ ئافرەتانی بەخشراوی بێلانە کرایەوە.
نەخۆشخانەکە توانای گرتنەخۆی 20 حاڵەتی هەیەو تایبەتە بۆ ئەو ئافرەتانەی کەلە ئێستادا بێ لانەن و نەخۆشی دەروونی درێژخایەنیان هەیەو لە شەقام و کۆڵانەکاندان و پێویستیان بە جێگا مانەوە و وەرگرتنی چارەسەری دەروونی هەیە .
لەوتەیەکدا بەڕێز پارێزگاری سلێمانی دەستخۆشی لەهەریەک لەبەڕێزان وەزیری کارو کاروباری کۆمەڵایەتی و تەندروستی کرد و کە پشتوانێکی گەورەی کەرتی کۆمەڵایەتی و تەندروستین و نەخۆشخانەکەی بە دەستکەوتێکی گەورە بۆ پارێزگای سلێمانی وەسف کرد.
دواتر وەزیری کارو کاروباری کۆمەڵایەتی لە کۆنگرە ڕۆژنامەوانیەکەدا ، سوپاسی بنەماڵەی کۆڵەک و یەکێتی ژنانی کرد کە بیناکەیان بەخشیوە ، وە لەسەر بودجەی حکومەتی هەرێمی کوردستان بڕی 95,000,000 دینار تەرخان کرا بۆ نۆژەن کردنەوەو دابین کردنی پێداویستیەکانی ، وە هەردوو بەڕێوەبەرایەتی گشتی چاودێری و گەشەپێدانی کۆمەڵایەتی و تەندروستی ئەرکی سەرپەرشتی کردن و چاودێری کردنی نەخۆشخانەکە لەئەستۆ دەگرن. کوێستان موحەممەد وتیشی نەخۆشخانەکە وەک یەکەمین نەخۆشخانەی تایبەت بە ژنانی بەخشراوەو لە ماوەیەکی نزیکدا لە پارێزگاکانی هەولێر و دهۆکیش دەیکەینەوە.
دواتر وەزیری تەندروستی لەبەردەم کەناڵەکانی ڕاگەیاندن ووتی :"لەگەڵ دەستبەکاربوونی کابینەی نۆیەمی حکومەتی هەرێم ،کاتێک دەمانبینی بەشەوو ڕۆژ ژمارەیەک ئافرەتی بەخشراو لە سەرشەقام و کۆڵانەکان دەمانەوە ،بەهاوبەشی لەگەڵ وەزیری کارو کاروباری کۆمەڵایەتی ئەم پڕۆژەیەمان خستە بەردەم سەرۆکایەتی ئەنجومەنی وەزیران و بەخۆشحاڵیەوە ڕەزامەندی دراو 70 کارمەند بۆ هەرسێ پارێزگاکە دامەزرێندران.
نەخۆشخانەی دەروونی چرا، سۆزێكە بۆ ئەو ئافرەتانەی توشی نەخۆشی دەرونی درێژخایەن بوون، لەو نەخۆشخانەیەدا چارەسەر و خزمەتێكی بەرچاوی ئەو كەسانە دەكرێت كە سەردانی دەكەن و چارەسەری پێویستی پزیشكی و دەروونیان بۆ دەكرێت.