بێستون جەبار:-" دۆخی ژیانی هاوڵاتیان زۆر خراپەو ڕێژەی هەژاری لەئێستادا بەرەو هەڵکشان دەچێت و پێویستە سەرمایەداران زیاتر بەدەم داواکەی وەزیری کارو کاروباری کۆمەڵایەتی بچێت"

لەسەر ڕاسپاردەی وەزیری کارو کاروباری کۆمەڵایەتی ئێوارەی ئەمڕۆ چوارشەممە، 27ـی ئـــــاداری 2024، بەڕێز بێستون جەبار بەڕێوەبەری گشتی چاودێری و گەشەپێدانی کۆمەڵایەتی لە پارێزگای سلێمانی بەوەکالەت، کاروانێکی بەبڕی 600 پاکێج گەیاندە قەزای شارەزوورو سەیدصادق و پێنجوێن.

بەڕێوەبەری گشتی بەوەکالەت بە سایتی فەرمی بەڕێوەبەرایەتی گشتی ڕاگەیاند."بارو دۆخی هاوڵاتیان زۆر خراپەو بەلەبەرچاوگرتنی ئەو قەیرانەی ڕوبەڕووی هاوڵاتیان بۆتەوە بەڕێز خاتوو کوێستان موحەممەد وەزیری کارو کاروباری کۆمەڵایەتی لەسەرەتای مانگی پیرۆزی ڕەمەزان داوای لەسەرمایەداران کرد پاکێجی خواردن و هاوکاری بگەیەننە هەژاران و هاوڵاتیانی خاوەن پێداویستی تایبەت و کەمدەرامەت ، بەخۆشحاڵیەوە ژمارەیەک لەوانە هاتن بەدەم بانگەوازەکەوە بەڵام وەک پێویست نیەو هێشتا هاوکاری زیاتر پێویستە"

ئەوەی جێگەی باسە بەڕێوەبەرایەتی گشتی، زیاتر لە 1000 پاکێجی تر لە ڕۆژانی ڕابردودا لەڕێگەی ڕێکخراوەکانی بواری خاوەن پێداویستی تایبەت و بێسەرپەرشتان بەسەر هاوڵاتیاندا دابەشکرد.