پرۆسه‌ی پێشوازی‌‌و وه‌رگرتنی خۆبه‌خشانی زیاتر بۆ كاری دامه‌زراوه كۆمه‌ڵایه‌تییه‌كان به‌رده‌وامه
ئه‌مڕۆ دووشه‌ممه، 24ی 10ی 2016، به سه‌رپه‌رشتی ئه‌ڵوه‌ن عه‌بدولغه‌فوور، یاریده‌دری به‌ڕێوه‌به‌ری گشتی بۆ كاروباری هونه‌ری‌‌و گوڵاڵه عه‌بدولقادر‌و پشتیوان موحه‌ممه‌د، ئه‌ندامانی لیژنه‌ی سه‌په‌رشتی‌‌و چاوپێكه‌وتنی خۆبه‌خشان بۆ كاری دامه‌زراوه كۆمه‌ڵایه‌تییه‌كان، پێشوازییان له ژماره‌یه‌كی تر له‌و گه‌نجه خۆبه‌خشانه كرد كه ئه‌یانه‌وێت له دامه‌زراوه كۆمه‌ڵایه‌تییه‌كان خۆبه‌خشانه له بواره جیاجیاكاندا خزمه‌ت بكه‌ن.
ئه‌و خۆبه‌خشانه‌ی ئه‌مڕۆ دیداریان له‌گه‌ڵ ئه‌نجامدرا ژماره‌یان (16) كوڕو كچ بوون، پێشتریش زیاتر له (32) كوڕو كچی تر چاوپێكه‌وتنیان له‌گه‌ڵ ئه‌نجامدرابوو بۆ كاری خۆبه‌خشی‌‌و پرۆسه‌ی پێشوازی‌‌و چاوپێكه‌وتنیش بۆ كاری خۆبه‌خشی به‌رده‌وامه.
جێی ئاماژه‌یه ئه‌مه بۆ یه‌كه‌مجاره به شێوه‌ی سیستماتیك پێشوازی له توانای گه‌نجانی سنوری پارێزگای سلێمانی ده‌كرێت بۆ كاری خۆبه‌خشی‌‌و خزمه‌تكردنی دامه‌زراوه كۆمه‌ڵایه‌تییه‌كان به‌تایبه‌ت منداڵان‌و به‌ساڵاچووان له خانه‌كانی له‌خۆگرتن.
له‌پاش به‌ڕێوه‌چوونی پرۆسه‌كه‌ش، عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی پێشوازی له لیژنه‌ی پێشوازی‌‌و چاوپێكه‌وتنی خۆبه‌خشه‌كان كردو ده‌ستخۆشی له سه‌رۆك‌و ئه‌ندامانی لیژنه‌كه‌‌و سه‌رجه‌م ئه‌و دڵسۆزانه كرد كه ئه‌یانه‌وێت خزمه‌ت به دامه‌زراوه كۆمه‌ڵایه‌تییه‌كان بكه‌ن.
|