بەڕێوەبەری گشتی ڕاگه‌یه‌نراویێکی تایبه‌ت به ڕۆژی جیهانی به‌ره‌نگاربوونه‌وه‌ی توندوتیژی دژی ژنان بڵاودەکاتەوە.
دەقی ڕاگەیەندراوی بەڕێز بەڕێوەبەری گشتی چاودێری و گەشەپێدانی کۆمەڵایەتی لە پارێزگای سلێمانی.
بەڕێزان ،هاوڵاتیانی خۆشەویست.
ئەمڕۆ ٢٥/نۆڤەمبەری/٢٠٢١ لە ڕۆژی جیهانی بەرەنگاربونەوەی توندوتیژی به‌رانبه‌ر ژناندا ،دڵنیاتان دەکەینەوە
ئێمه له به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی له‌پارێزگای سلێمانی، جه‌خت ده‌كه‌ینه‌وه له‌سه‌ر ئه‌وه‌ی پێویسته هه‌موو كۆمه‌ڵگه‌و دامه‌زراوه حكومی‌‌و ناحكومییه‌كان پێكه‌وه كاربكه‌ین بۆ به‌دیهێنانی كوردستانێكی خاڵی له توندوتیژی‌‌و پێشێلكاری ماف دژی ژنان، هه‌ربۆیه له ڕوانگه‌ی ئه‌رك‌و به‌رپرسیارێتی یاسایی‌‌و ئه‌خلاقیمانه‌وه له ڕێگه‌ی به‌ش‌و هۆبه په‌یوه‌ندیداره‌كانمانه‌وه به‌شدارێكی كاراین له ڕووبه‌ڕووبوونه‌وه‌ی توندوتیژی دژی ژنان و سنوردانان بۆ پێشێلكارییه‌كان‌و بڵاوكردنه‌وه‌ی هوشیاریی ڕاست‌و دروست به‌رانبه‌ر ماف‌و ئه‌رك‌و به‌رپرسیارێتییه‌كانی ژنان له كۆمه‌ڵگه‌دا.
له‌م ڕوانگه‌یه‌وه به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی له‌پارێزگای سلێمانی خوازیاره خێزانه‌كان وشیارانه‌تر به‌رپرسیارێتی به‌رانبه‌ر منداڵه كچه‌كانیان هه‌ڵبگرن بۆ دروست کردنی نەوەیەکی كۆمه‌ڵایه‌تییانه‌ی تەندروست، پێویسته له خوار ته‌مه‌نی ١٨ ساڵییه‌وه خێزانه‌كان‌و ته‌واوی كۆمه‌ڵگه سه‌رقاڵی په‌روه‌رده‌و فێركردن‌و پێگه‌یاندن‌و تێگه‌یاندن‌و ئاماده‌كردنی كچان‌و كوڕان بێت بۆ قۆناغه‌كانی ئاینده‌ی ژیان و هه‌ڵگرتنی ئه‌و به‌رپرسیارێتییه جۆراوجۆرانه‌ی كه كۆمه‌ڵگه‌و ئاینده‌ی گه‌ل چاوه‌ڕوانیانه.
توندو تیژی دژی کچان و ژنان له ناشیرینترین‌و دزێوترین پێشێلكارییه‌كانی مافی مرۆڤه، به‌تایبه‌ت ئه‌و كاته‌ی بنه‌ماكه‌ی جیاوازی ڕه‌گه‌زی‌‌و به كه‌م سه‌یركردنی ژنان و هه‌وڵدان بێت بۆ په‌راوێزخستنی‌‌و ڕێگه نه‌دان به‌وه‌ی هاوشانی پیاوان ڕۆڵی خۆی بگێڕێت.
بەهیوای ئەوەی هەمولایەکتان بە دور بن لە توندوتیژی و هەمیشە لە ئارامی و خۆشیدا بژین.
نەهرۆ عەبدوڵڵا عەلی
بەڕێوەبەری گشتی بە وەکالەت
٢٥/نۆڤەمبەری/٢٠٢١