ئەمڕۆ ، ٢١/نۆڤەمبەری/ ٢٠٢١ ، لە دیوانی بەڕێوەبەرایەتی گشتی چاودێری و گەشەپێدانی کۆمەڵایەتی لە پارێزگای سلێمانی و بەڕێوەبەرایەتی تۆڕی پاراستنی سلێمانی ، دروست کردنی ناسنامەی نوێی کەمئەندامان دەستی پێکرد.
ناسنامەکە لە ناو سیستەمێکی داتابەیس جێگیر دەکرێت ،کە بۆ ڕێکخستنی تۆمارو لیستی موچە و تۆمار کردنی زانیاریەکانی سودمەندانی کەمئەندامان و بە ئەلکترۆنی کردنی لەسەر ویبسایتی بەڕێوەبەرایەتی گشتی ،بۆ کار ئاسان کردنی کاری کەمئەندامان دروست دەکرێت.

بەڕێز، هیوا ڕەحمان ، سەرۆکی لیژنەی دروست کردنی پێناسی نوێی کەمئەندامان ڕایگەیاند ، پڕۆسەکە لە یەکەم ڕۆژی دا بەشێوەکی باش بێ کێشەو گرفت بەڕێوەچوو ، وە باسی چۆنیه‌تی‌ دروست کردنی ناسنامەکەی کرد کە لە چوارچێوەی (یاسای ماف و ئیمتیازاتی کەمئەندام و خاوەنپێداویستی تایبەت) هاتووەو سەرەڕای کەمکردنەوەی ڕۆتین و چارەسەرکردنی زۆرێک لە گرفتەکانی کەمئەندامان ئەم پێناسەیە کەمئەندامی ناشایستە جیادەکاتەوەو هەوڵ دانە بۆ تۆمارکردنی کەمئەندامی نوێ.

وە هەروەها بەڕێزیان داوایان لە هەموو کەمئەندامانی بەڕێز کرد بە هیچ شێوەیەک سەردانی بەڕێوەبەرایەتی گشتی نەکەن بە مەبەستی دروست کردنی ناسنامە هەتا لەڕێگەی تێلەفونەوە ئاگادار دەکرێنەوە. و ئەم ناسنامەیە تەنها بۆ ئەو کەمئەندامانەیە کە ناویان تۆمارە .