عومەر گوڵپی: سەرچاوەی یەکەمی بنەبڕکردنی دیاردەی سواڵکردن ئەوەیە کە خەڵک پارەیان پێ نەدات
لە چوارچێوەی میوانداریکردنی لە بەرنامەی (شەقام)ی ڕادیۆ نەوا کە سەعات ١٢ی ڕۆژی یەکشەممە، ١٤ی ٧ی ٢٠١٩ی پەخشکراو تایبەت بوو بە دیاردەی سواڵ‌و دەرۆزەکردن، بەڕێز م.عومەر گوڵپی، بەڕێوەبەری گشتی چاودێری و گەشەپێدانی کۆمەڵایەتی لەپارێزگای سلێمانی ڕایگەیاند: " سەرچاوەی یەکەمی بنەبڕکردن‌و ڕووبەڕووبوونەوەی سواڵکردن بریتیە لەوەی کە خەڵک پارە نەدات بەو کەسانە لە هیچ بارودۆخێک‌و بە هیچ پاساوێک".
هەر لە بەرنامەکەدا بەڕێز بەڕێوەبەری گشتی ئاماژەی بەوە کرد کە دیاردەی سواڵ دیاردەیەکی جیهانیەو لە هەموو وڵاتانی پێشکەوتوو و دواکەوتوو بە فۆرمی جیاواز هەیە، هەربۆیە سواڵکردن تایبەت نیە بە سلێمانی یان کوردستان، بەڵام پێویستە ئێمەو سەرجەم دامەزراوە پەیوەندیدارەکان کاربکەین بۆ سنوردارکردن‌و ڕووبەڕووبونەوەی، هەروەک ئاماژەی بەوەدا کە دۆخی شەڕو ئاوارەیی بەشێکە لە زیادکردنی دیاردەی سواڵ.
سەبارەت بە ڕێگاکانی ڕووبەڕووبوونەوەی دیاردەی سواڵ‌و دەرۆزەکردن بەڕێز بەرێوەبەری گشتی وتی: پێویستە بە سێ ڕێگا ڕووبەڕووی ئەو دیاردەیە ببینەوە:
١ـ خەڵک پارە بە سواڵکەرەکان نەدات لە هیچ دۆخێک‌و لە ژێر هیچ پاساوێکدا، چونکە سەرچاوەی یەکەم‌و زۆر بەهێزی سواڵ پارەی خەڵکە با بڕەکەش بچوک بێت، چونکە سواڵکەرەکان هەژار نین‌و کەسانێکن پیشەکەیان سواڵە.
٢ـ یاسای نوێ لە پەرلەمانەوە دەربچێت بە جۆرێک دەستی دادگاو دادوەرە بەڕێزەکان کراوەتر بکات بۆ سزادانی ئەوانەی کە سواڵ دەکەن یان سواڵ بە منداڵ‌و بەساڵاچووان دەکەن.
٣ـ دەزگاکانی پۆلیس‌و ئاسایش‌و لایەنە پەیوەندیدارەکانی تر وەک کۆمەڵایەتی‌‌و مافی مرۆڤ باشتر کاربکەن بۆ ڕووبەڕووبوونەوەو سزادانی ئەوانەی کە بە شێوەی گروپ‌و رێکخراو کاری سواڵ دەکەن بە کەسانی تر.