به‌ڕێوه‌به‌رایه‌تی گشتی له‌گه‌ڵ ڕێكخراوێكی ئیتالی ڕێككه‌وتنێك واژۆ ده‌كات بۆ خزمه‌تی سودمه‌ندانی ماڵی داڵده‌دانی ژنان سلێمانی
ڕۆژی پێنجشه‌ممه، 20ی 6ی 2019، به ئاماده‌بوونی به‌ڕێز م.عومه‌ر گوڵپی، به‌ڕێوه‌به‌رای گشتی چاودێڕی‌‌و گه‌شه‌پێدانی كۆمه‌ڵایه‌تی له پارێزگای سلێمانی‌‌و هه‌ریه‌كه له به‌ڕێزان سۆران سه‌عید، به‌رپرسی به‌شی پلان‌و ئاراس ناصر، به‌رپرسی به‌شی پارێزگاری خێزان‌و پرشنگ كه‌ریم، به‌رپرسی په‌یوه‌ندییه‌كان‌و هیوا سه‌عید، به‌رپرسی به‌شی دایه‌نگه‌كان‌و ڕێبوار ڕه‌سول، به‌رپرسی به‌شی یاساو ڕێزان گورون، به‌رپرسی ژمێریاری‌‌و به‌ڕێزان تێریزا بسكوسی، به‌ڕێوه‌به‌ری پڕۆژه‌و شوان عه‌زیز، به‌ڕێوه‌به‌ری نوسینگه‌ی سلێمانی ڕێكخراوه‌كه، به‌ڕێوه‌به‌رایه‌تی گشتی ڕێككه‌وتنێكی له‌گه‌ڵ ڕێكخراوی ئون پونتی ئیتالی (unponteper - upp) واژۆكرد.
به پێی ڕێككه‌وتنه‌كه، ڕێكخراوی ناوبراو هه‌ڵده‌ستێت به ڕاهێنانی پیشه‌یی بۆ سودمه‌ندانی ماڵی داڵده‌دانی ژنانی هه‌ڕه‌شه‌لێكراوی سلێمانی‌‌و پاشان دۆزینه‌وه‌ی كار پاش ئه‌وه‌ی دۆخی ژیانیان ئاسایی بوویه‌وه‌و گه‌ڕانه‌وه ناو خانه‌واده‌كانی خۆیان.
له‌و ڕێككه‌وتنه‌دا به‌ڕێز به‌ڕێوه‌به‌ری گشتی به سایتی فه‌رمی به‌ڕێوه‌به‌رایه‌تی گشتی ڕاگه‌یاند :"ڕێككه‌وتنه‌كه به هه‌ردوو ڕێگه‌ی ڕاهێنانی فێركاری پێدانی پاره‌ی كاش خزمه‌ت به سودمه‌ندان ده‌كات بۆ ماوه‌ی سێ مانگ، پاشان به‌رده‌وام ده‌بێت تا ئه‌و كاته‌ی كار بۆ ئه‌و ژنانه ده‌ده‌زێته‌وه كه كێشه‌كانیان چاره‌سه‌ر ده‌بێت‌و ده‌گه‌ڕێنه‌وه ژیانی ئاسایی، ئه‌مه‌ش له ڕوانگه‌ی ئه‌و گرنگیپێدان‌و به‌رنامانه‌دایه كه به‌ڕێوه‌به‌رایه‌تی گشتیمان به شێوه‌یه‌كی پلان بۆ دانراو كاره‌كانی ڕاده‌په‌ڕێنێت‌و ئامانجمانه كاری گه‌شه‌پێدانی كۆمه‌لایه‌تی هاوشانی چاودێری كۆمه‌ڵایه‌تی گه‌شه بكات".
|