لاپه‌ڕه‌ی په‌یمانگای هیوای نابیستان
وێنه‌ی قوتابیان‌و مامۆستایان په‌یمانگا له‌گه‌ڵ به‌ڕێوه‌به‌ری گشتی‌‌و ژماره‌یه‌ك له به‌رپرسان‌و په‌رله‌مانتاران، 2016.
ئه‌م په‌یمانگه‌یه له‌ساڵی (1982-1983) له‌لایه‌ن وه‌زاره‌تی كار‌وكاروباری كۆمه‌ڵایه‌تیه‌وه دامه‌زراوه، كه ناوه‌ندێكی په‌روه‌رده‌ی‌و ڕاهێنانی نابیستانه، له‌سه‌ر سیستمی په‌روه‌رده‌یی نوێ‌‌و هاوكات فێركردنی نابیست به‌زمان‌و هێما‌و ئاماژه، كه له‌قۆناغه‌كانی باخچه‌ی ساوایان تا قۆناغه‌كانی خوێندنی بنه‌ڕه‌تی ده‌گرێته‌وه
زانیاریی پێویست:
به‌ڕێوه‌به‌ر: به‌هار عه‌بدوڕه‌حیم نه‌جم/ به‌كالۆریۆس له زانستی ده‌روونناسی.
ناونیشان: سلێمانی - گردی جۆگه، خوار ئاماده‌یی هه‌ڵكه‌وتی كوڕان.
ژماره ته‌له‌فون: 0533231697
باخچه‌ی ساوایانی نابیست:
باخچه‌یه‌كی تایبه‌ته به‌منداڵانی نابیست، كه هێشتا نه‌گه‌یشتوونه‌ته ته‌مه‌نی خوێندن، له‌م باخچه‌یه‌دا منداڵ ئاماده‌ده‌كرێت بۆ په‌یمانگه.
په‌یمانگه‌كه سه‌ره‌تا خوێندنگه‌یه‌ی سه‌ره‌تایی بووه، واته ساده‌و ساكار بووه له‌ڕووی شوێن‌و هه‌بوونی كارمه‌ندو مامۆستا‌و توێژه‌رو وه‌رگرتنی خوێندكار، ناو په‌یمانگه سه‌ره‌تا به‌ناوی په‌یمانگه‌ی هیوای كه‌ڕوڵاڵانه بووه، به‌ڵام له‌پاش چه‌ند ساڵێك ناوه‌كه‌ی گۆڕدرا به‌په‌یمانگه‌ی هیوای نابیستان، ئه‌م په‌یمانگه‌یه وه‌ك هه‌ر خوێندنگه‌یه‌كی دیكه‌ی بنه‌ره‌تی به‌پێی سیستمی نوێی په‌روه‌رده له‌پۆلی یه‌كه‌می بنه‌ڕه‌تی تا پۆلی نۆیه‌می بنه‌ڕه‌تی تێدایه، شێوازی خوێندن تێدا زمانی ئاماژه‌‌و هێما‌و جوڵه‌ی لێوه بۆ خوێندكاران، كه له‌لایه‌ن مامۆستا‌و ڕاهێنه‌ره‌وه پڕۆگرامی خوێندن ده‌وترێته‌وه.
خوێندكاران به‌پێنج وانه‌ی زانستی‌‌و زمانه‌وانی‌‌و هونه‌ری‌و وه‌رزش ئاشنا ده‌كرێن.
ئامانجی په‌یمانگه په‌روه‌رده‌كردن‌و فێركردنی خوێندكاری نابیسته به‌زمانی ئاماژه بۆ ئه‌وه‌ی وه‌كو هه‌موو خوێندكارێكی ئاسایی قۆناغه‌كانی خوێندن ته‌واو بكات به‌هه‌مان پڕۆگرامی خوێندنی په‌روه‌رده.
مه‌رجه‌كانی وه‌رگرتن:
وه‌رگرتنی خوێندكاری نابیست له‌لایه‌ن لیژنه‌یه‌كی تایبه‌ت له‌په‌یمانگه دیاری ده‌كرێت، كه مه‌رجه خوێندكار نابیست بێت، یاخود كه‌مبیست بێت، وه هیچ كه‌مئه‌ندامییه‌كی جه‌سته‌یی‌و ژیری نه‌بێت‌و بتوانێت پشت به‌خۆی ببه‌ستێت‌و توانای فێربوونی هه‌بێت‌و دانیشتوی سنوری شاری سلێمانی بێت‌و ناونیشانی ته‌واو‌و شوێنی نیشته‌جێبوونی دیاری هه‌بێت، به‌پێی ڕاپۆرتی پزیشكی كه ده‌ستنیشانی ئاستی نه‌بیستنی دیاری بكات، وه به‌و پێیه خوێندكار وه‌رده‌گیرێت.