شاندێکی بەڕێوەبەرایەتی گشتی چەند پڕۆژەیەک بۆ خاوەن پێداویستی تایبەت و دایەنگەی حکومی لەگەڵ بەڕێوەبەرایەتی گشتی وەبەرهێنان تاوتوێ دەکەن.
م.ئیسماعیل ڕەشید : پێویستە لە پڕۆژەکانی نیشتەجێبوون و هەر پڕۆژەیەکی تردا ڕەچاوی بارو دۆخی هاوڵاتیانی خاوەن پێداویستی تایبەت و هەژاران بکرێت.
ئەمڕۆ یەکشەممە ،1ـی تشرینی دووەمی2022، شاندێکی بەڕێوبەرایەتی گشتی بە سەرۆکایەتی بەڕێز م. ئیسماعیل ڕەشید، بەڕێوەبەری گشتی چاودێری و گەشەپێدانی کۆمەڵایەتی لە پارێزگای سلێمانی ، ئەندامێتی بەڕێزان ، ئەندازیار ،بەختیار عەلی، بەرپرسی بەشی ئەندازیاری ، ئاراس ناصر، بەرپرسی پارێزگاری خێزان، سۆران سەعید،بەرپرسی بەشی دایەنگەکان، سەردانی بەڕێوەبەرایەتی گشتی وەبەرهێنانیان کرد و لە لایەن بەڕێز ئەندازیار، عەزیز عەلی ، بەڕێوەبەری گشتی وەبەرهێنانی سلێمانیەوە پێشوازی کران.
لەو سەردانەدا هەردوو بەڕێوەبەرایەتی گشتی باسیان لە کارە هاوبەشەکان و هەماهەنگی نێوان کرد و چەند پڕۆژەیەک بۆ خزمەتی هاوڵاتیاتی خاوەن پێداویستی تایبەت و دروست کردنی دایەنگە تاو توێ کران. پاشان گفتوگۆی یەکەکانی نیشتەجێبوون و خزمەتگوزاری دایەنگەو چارەسەرکردنی ئەو گرفتانەی دەبنە ڕێگر لەبەردەم وەرگرتنی کۆتایی و بەکارهێنانی بیناکانی تایبەت بە دایەنگە کران.
لە بەشێکی تری دیدارەکەدا بەڕێز بەڕێوەبەری گشتی داوای لە بەڕێوەبەرایەتی گشتی وەبەرهێنان کرد هاوکارو پاڵپشتیان بێت لە جێ بەجێکردنی ماددەی ١١ی یاسای ژمارە ٢٢ی ساڵی ٢٠١١ی تایبە بە ماف و ئیمتیازی هاووڵاتیانی خاوەن پێداویستی تایبەت و هەروەها داوای کرد لە پڕۆژەکانی نیشتەجێبوون و هەر پڕۆژەیەکی تردا ڕەچاوی بارو دۆخی هاوڵاتیانی خاوەن پێداویستی تایبەت و هەژاران بکرێت..
هەر لەو دیدارەدا بەرێز بەڕێوەبەری گشتی داوای کرد چەند پڕۆژەیەک لە قەزاو ناحیەکان لە سودی منداڵانی ئۆتیزم و ڕاهێنانی منداڵانی شەلەل دەماخ و دایەنگەی مۆدێرن دروست بکرێت، بۆ ئەوەی شارو شارۆچکەکانمان بە تەواوەتی ژینگەیەکی گونجاوو لەباربێت بۆ ژیانی هاووڵاتیانی خاوەن پێداویستی تایبەت.
لە بەرانبەردا بەرێز بەڕێوەبەری گشتی وەبەرهێنان خۆشحاڵی خۆیان بە دیدارەکە دەربڕی و جەخیتیان کردەوە بە تەواوی توانای خۆیانەوە هاوکار دەبن و لە بارەتی تایبەتمەندی پڕۆژەکانەوە بۆ کەمئەندامان و هەژاران هەوڵ دەدەن و رێوشوێنی پێویست بۆ جێ بەجێکردنیان دەدۆزنەوە، هەورەک پێشنیاری پێویستیشیان خستەبەردەم بەرێوەبەرایەتی گشتیمان بۆ پەرەپێدان ئەو پڕۆژانەی باسیان لێوە کران.