ڕاگه‌یه‌نراوێك له به‌ڕێوه‌به‌رایه‌تی گشتیه‌وه، سه‌باره‌ت به‌ڕووداوی گیان له‌ده‌ستدانی دایكێك‌و سێ منداڵه‌كه‌ی له شاری چه‌مچه‌ماڵ
به‌ناوی به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی، پرسه‌و سه‌ره‌خۆشی خۆمان ئاراسته‌ی بنه‌ماڵه‌و كه‌س‌و كاری خوالێخۆشبوو (سێوان قادر) ده‌كه‌ین كه پاش ڕووداوێكی ئازار به‌خش‌و گیان له‌ده‌ستدانی هه‌رسێ منداڵه‌كه‌ی له ڕووداوێكی سوتاندا له به‌رواری 17ی 12ی 2018 له شاری چه‌مچه‌ماڵ، ئه‌مڕۆ پاش مانه‌وه‌ی چه‌ند ڕۆژێك له نه‌خۆشخانه گیانی له‌ده‌ستدا.
له ڕووداوێكی سه‌خت‌و پڕ له ئازاری له‌مجۆره‌دا، سه‌ره‌ڕای چاوه‌ڕوانیمان له دامه‌زراوه په‌یوه‌ندیداره‌كان به ئه‌نجام گه‌یشتنی لێكۆڵینه‌وه‌كان بۆ ئه‌وه‌ی له زووترین كاتدا هۆكاره‌كانی ئه‌م ڕووداوه ناخۆشه بدۆزنه‌وه‌و سزای ئه‌و كه‌سانه بده‌ن كه تۆمه‌تیان له‌سه‌ر ساغ ده‌بێته‌وه، له هه‌مان كاتدا به پێویستی ده‌زانین ئه‌م ڕووداوه پڕ له ئازاره هه‌موو كۆمه‌ڵگه‌و دامه‌زراوه په‌یوه‌ندیداره‌كانی حكومه‌ت‌و په‌رله‌مان بخاته به‌رده‌م بیركردنه‌وه‌یه‌كی قووڵ بۆ گه‌ڕان به‌دوای سه‌رجه‌م هۆكارو پاڵنه‌ره ڕاسته‌قینه‌كانی ئه‌مجۆره ڕووداوانه‌و توندوتیژییه خێزانیه‌كان‌و دانانی چاره‌سه‌رو ڕێوشوێنی گونجاو بۆ ڕێگه‌گرتن له دووباره‌بوونه‌وه‌ی ڕووداوی پڕ خه‌م‌و ئازارو ناخ هه‌ژێنی له‌مجۆره.
ڕاگه‌یاندنی به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی
24ی 12ی 2018
|