وه‌زاره‌تی كار بەشداری کۆبوونەوەی ساڵانەی بەشی پاراستنی منداڵی ڕێکخراوی یونسێف دەکەن
ڕۆژی پێنجشه‌ممه، 8ی 11ی 2018، لە هۆتێل جوهەینەی شاری هەولێر، به‌شی پاراستنی منداڵ له نووسینگه‌ی هه‌رێمی كوردستانی ڕێكخراوی یونسێف كۆبوونه‌وه‌ی ساڵانه‌ی خۆی ئه‌نجامداو تیایدا به‌ڕێوه‌به‌رایه‌تییه گشتییه‌كانی سلێمانی و هه‌ولێرو گه‌رمیانی كۆمه‌ڵایه‌تی و به‌ڕێوه‌به‌رایه‌تی گشتی چاكسازییه‌كان له وه‌زاره‌تی كارو ژماره‌یه له به‌رپرسانی پۆلیس و ڕێكخراوه نێو خۆیی نێوده‌وڵه‌تییه‌كان و دادوه‌ری نه‌وجه‌وانان و پۆلیسی نه‌وجه‌وانان له شاری كه‌ركوك به‌شداری كۆبوونه‌وه‌كه بوون.
كۆبوونه‌وه‌كه دابه‌ش بوو بوو بۆ دوو به‌شی سه‌رله‌به‌یانی و سه‌ر له ئێوه، له كۆبوونه‌وه‌ی یه‌كه‌می سه‌رله‌به‌یانیدا، بابه‌ته گفتوگۆكراوه‌كان بریتیبوون له‌و پلان و كارانه‌ی ڕێكخراوه‌كه به‌هاوكاری ده‌زگاكانی حكومه‌ت له بواره‌كانی یاساو سیاسه‌تی پاراستنی منداڵ‌و دادگه‌ری نه‌وجه‌وانان و خێزانی جێگره‌وه به ئه‌نجامی گه‌یاندوون.
له به‌شی دووه‌می سه‌ر له ئێواره‌ی كۆبوونه‌وه‌ی ساڵانه‌ی ڕێكخراوه‌كه‌دا ئاماده‌بووان پیاچوونه‌وه‌یان كرد به‌و پڕۆژانه‌ی له ڕێگه‌ی به‌ڕێوه‌به‌رایه‌تییه گشتییه‌كانی هه‌ولێرو سلێمانی و گه‌رمیان‌و هێندێك ڕێكخراوی تره‌وه بۆ منداڵان و گه‌نجان و كۆمه‌ڵگه‌ی ئاواره‌كان ئه‌نجامده‌درێت.
له هه‌ردوو كۆبوونه‌وه‌كه ئاماده‌بووان گفتوگۆی ته‌واوی ته‌وه‌ره‌كانیان كردو پێنشیاری گونجاویان بۆ پلان و كاری ڕێكخراوه‌كه له ساڵی 2019 له بواری پاراستنی منداڵ خسته‌ڕوو.
له‌و كۆبوونه‌وه‌یه‌دا هه‌ریه‌كه له به‌ڕێزان م.عومه‌ر گوڵپی، ده‌روون عومه‌ر، یوسف چاوشین، به‌ڕێوه‌به‌رانی گشتی چاودێری‌‌و گه‌شه‌پێدانی كۆمه‌ڵایه‌تی له پارێزگاكانی سلێمانی و گه‌رمیان و هه‌ولێر،و هه‌ریه‌كه له به‌ڕێزان د.ئه‌حمه‌د نه‌جمه‌دین، به‌ڕێوه‌به‌ری گشتی چاكسازییه‌كان و خاتوو نه‌جاح، جێگری به‌ڕێوه‌به‌ری گشتی دیوان و موحه‌ممه‌د عه‌لی، به‌رپرسی هۆبه‌ی خێزانی جێگره‌وه له سلێمانی و ژماره‌یه‌ك له به‌رپرسانی بواری پاراستنی منداڵ له وه‌زاره‌ت و به‌ڕێوه‌به‌رایه‌تییه گشتییه‌كان ئاماده‌بوون.
|