لیژنه‌ی باڵای كۆنفرانسی په‌ره‌پێدانی په‌یمانگاو سه‌نته‌ره‌كانی خاوه‌ن پێداویستی تایبه‌ت یه‌كه‌م كۆبوونه‌وه‌ی ئه‌نجامدا
ڕۆژی چوارشه‌ممه، 15ی 5ی 2018، لیژنه‌ی باڵای ئاماده‌كاری‌‌و سه‌رپه‌رشتی كۆنفرانسی په‌ره‌پێدانی په‌یمانگاو سه‌نته‌ره‌كانی په‌روه‌رده‌و ڕاهێنانی منداڵانی خاوه‌ن پێداویستی تایبه‌ت كۆبوویه‌وه.
به ئاماده‌بوونی به‌ڕێزان (گه‌شه دارا حه‌فید/ سه‌رۆكی لیژنه‌ی كاروباری كۆمه‌ڵایه‌تی لە پەرلەمانى كوردستان، عومه‌ر گوڵپی/ به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی، د.كه‌ریم شه‌ریف قه‌ره‌چه‌تانی/ پڕۆفیسۆر له زانكۆ سلێمانی، م.ئیبراهیم/ به‌ڕێوه‌به‌ری فێركردنی نائاسایی له به‌ڕێوه‌به‌رایه‌تی گشتی په‌روه‌رده، ئاشتی نورى/ به‌ڕێوه‌به‌ری چاودێری كه‌مئه‌ندامانی سلێمانی، موحه‌ممه‌د سه‌ید قادر/ سه‌رپه‌رشتیاری په‌روه‌رده‌یی، سۆران سه‌عید/ به‌رپرسی به‌شی پلان‌و به دواداچوون له دیوانی به‌ڕێوه‌به‌رایه‌تی گشتی) لیژنه‌ی باڵای سه‌رپه‌رشتی كۆنفرانسی په‌ره‌پێدانی په‌یمانگاو سه‌نته‌ره‌كانی په‌روه‌رده‌و ڕاهێنانی منداڵانی خاوه‌ن پێداویستی تایبه‌ت كۆبوویه‌وه له دیوانی به‌ڕێوه‌به‌رایه‌تی گشتی كۆبوویه‌وه.
له كۆبوونه‌وه‌كه‌دا به وردی گفتوگۆ له‌سه‌ر شێوازی به‌ڕێوه‌چوونی په‌یمانگاو سه‌نته‌ره‌كان كراو باس كێشه‌و گرفته‌كانین‌و گرفتی منداڵانی خاوه‌ن پێداویستی تایبه‌ت له‌باره‌ی به‌رده‌ستنه‌بوونی خوێندن‌و كه‌می‌‌و گرفتی تری ئه‌و بواره تاوتوێكران.
وه‌ك هه‌نگاوی یه‌كه‌م بۆ كاره‌كانی بڕیاردرا په‌یمانگاو سه‌نته‌ره‌كانی (هیوا بۆ نابیستان، ڕووناكی بۆنابینایان، ئاوات بۆ په‌روه‌رده‌ی مێشك، هانا بۆ شیاندنی كه‌مئه‌ندامان، سه‌نته‌ری ئۆتیزم، سه‌نته‌ری ڕۆشنایی) ڕاپۆرتی خۆیان سه‌باره‌ت به سیتم‌و شێوازی به‌ڕێوه‌چوونی زانستی‌‌و كارگێڕی په‌یمانگاو سه‌نته‌ره‌كانیان ئاماده‌بكه‌ن بۆ ئه‌وه‌ی لیژنه‌ی باڵا هه‌نگاوه‌كانی داهاتووی بهاوێژێت، هه‌روه‌ها بڕیاردرا میكانزیمی گونجاو بدۆزرێته‌وه بۆ چۆنیه‌تی به‌شداری سه‌رجه‌م لایه‌نه‌كانی په‌یوه‌ست به پرسی فێركردن‌و ڕاهێنانی تایبه‌ت له سه‌ر ئاستی كوردستان.
|