كۆبوونه‌وه‌ی فراوانی به‌ڕێوه‌به‌رایه‌تی گشتی به‌ڕێوه‌چوو
به‌مه‌به‌ستی گفتوگۆ له‌باره‌ی كاری ساڵێكی ڕابردوو هه‌روه‌ها به‌رنامه چاكسازییه‌كانی حكومه‌ت‌و گرتنه‌به‌ری ڕێوشوێنی پێویست بۆ كه‌مكردنه‌وه‌ی خه‌رجی‌‌و بچوككردنه‌وه‌ی قه‌باره‌ی په‌یكه‌ری ڕێكخستنی ئیداری، ڕۆژی سێشه‌ممه، 8ی ئازاری2016، به‌سه‌رپه‌رشتی عومه‌ر گوڵپی به‌ڕێوه‌به‌ری گشتی له دیوانی به‌ڕێوه‌به‌رایه‌تی گشتی كۆبوونه‌وه‌یه‌كی فراوان به‌ڕێوه‌چوو .
له‌و كۆبوونه‌وه‌یه‌دا كه به‌ڕێوه‌به‌ری سه‌رجه‌م به‌ڕێوه‌به‌رێتییه‌كان‌و لێپرسراوی سه‌رجه‌م به‌شه‌كانی دیوان تیایدا ئاماده‌بوون، له ماوه‌ی 2 كتژمێردا گفتوگۆ له‌سه‌ر كاره‌كانی به‌ڕێوه‌به‌رایه‌تی گشتی كرا، هه‌روه‌ك پێشنیاری گونجاو بۆ كه‌مكردنه‌وه‌ی خه‌رجی خرایه ڕوو، ته‌وه‌رێكی تری كۆبوونه‌وه‌كه‌ش ته‌رخان بوو بۆ گفتوگۆكردن له‌سه‌ر چۆنییه‌تی چاكسازی له لیسته‌كانی چاودێریی خێزان‌و كه‌مئه‌ندامان به‌جۆرێك به‌سڕینه‌وه‌ی خه‌ڵكانی ناشایسته كه له ده‌ره‌وه‌ی یاساو ڕێنماییه‌كان بوونه‌ته خاوه‌نی مووچه‌و هاوكاری كۆمه‌ڵایه‌تی خه‌ڵكانی شایسته زیاد بكرێن‌و كه هیچ ده‌رامه‌ت‌و سه‌رچاوه‌یه‌كیان بۆ بژێوی ژیانیان نییه .
|