به‌ڕێوه‌به‌رایه‌تی گشتی سزای دایه‌نگه‌یه‌ك ده‌دات‌و پله‌كه‌شی داده‌به‌زێنێت
به پێی هه‌ردوو نووسراوی ژماره (961) له 11ی 4ی 2018، ژماره (1053) له 22ی 4ی 2018، كه له به‌شی دایه‌نگه‌كان ده‌رچووه‌و واژۆی به‌ڕێوه‌به‌ری گشتی له‌سه‌ره، به‌ڕێوه‌به‌رایه‌تی گشتی سزای (ئاگاداركردنه‌وه) ئاراسته‌ی دایه‌نگه‌ی (ئایه)ی ناحكومی ده‌كات‌و پله‌و ئاسته‌كه‌شی له گروپی (ئه‌ی - A) داده‌به‌زێنێت بۆ گروپی (بی - B).
له ناوه‌ڕۆكی نووسراوی ژماره (961)دا هاتووه:" ئاماژه به ڕاپۆرتی لیژنه‌ی سه‌رپه‌رشتی‌‌و به‌دواداچوونی دایه‌نگه‌كان له به‌شی دایه‌نگه‌كان له به‌رواری 8ی 4ی 2018، پاڵپشت به‌بڕگه‌ی یه‌كه‌م، مادده‌ی چوارده‌ی (ڕێنمایی دایه‌نگه‌كان) ژماره (1)ی ساڵی 2015، سزای ئاگاداركردنه‌وه ئاراسته‌ی دایه‌نگه‌ی (ئایه)ی ناحكومی ده‌كه‌ین به‌هۆی بوونی كه‌م‌و كورتی له دایه‌نگه له ڕووی خزمه‌تكردنی منداڵان‌و ڕه‌خساندنی ژینگه‌یه‌كی گونجاو بۆیان".
هه‌روه‌ها له ناوه‌ڕۆكی نووسراوی ژماره (1053)دا هاتووه: " ئاماژه به ڕاپۆرتی لیژنه‌ی هه‌ڵسه‌نگاندنی دایه‌نگه‌كان بڕیارماندا به دابه‌زاندنی پله‌و ئاستی دایه‌نگه‌ی ئایه‌ی ناحكومی له گروپی (ئه‌ی - A) بۆ گروپی (بی - B)".
جێی ئاماژه‌یه به‌شی دایه‌نگه‌كان له به‌ڕێوه‌به‌رایه‌تی گشتی له ڕێگه‌ی لیژنه‌ی تایبه‌ته‌وه سه‌رپه‌رشتی دایه‌نگه‌كان ده‌كات‌و له‌كاتی بوونی كه‌م‌و كورتیدا به پێی یاسا سزا ئاراسته‌ی دایه‌نگه‌كان ده‌كات‌و له كاتی نه‌بوونی هیچ كه‌م‌و كورتی‌‌و گرفتێكدا سوپاس‌و ده‌ستخۆشی، به پێی ڕێنمایی دایه‌نگه‌كانیش هه‌ر دایه‌نگه‌یه‌ك دوو جار سزای ئاگاداركردنه‌وه‌ی وه‌رگرت مۆڵه‌ته‌كه‌ی لێ ده‌سه‌نرێته‌وه‌و خاوه‌نی دایه‌نگه بۆی نییه تا دوو ساڵ داوای مۆڵه‌تی نوێ بكات، كاره‌كانی لیژنه‌كانیش ته‌نها له پێناو به‌رژه‌وه‌ندی منداڵ‌و ڕه‌خساندنی ژینگه‌یه‌كی ته‌ندروسته بۆ گه‌شه‌ی هه‌مه‌لایه‌نه‌ی منداڵ.
|