به‌هۆی سه‌رپێچی له ڕێنماییه‌كان، به‌ڕێوه‌به‌رایه‌تی گشتی دایه‌نگه‌یه‌ك داده‌خات
به پێی فه‌رمانی كارگێڕی، ژماره (796) له 7ی 3ی 2018، كه له به‌شی دایه‌نگه‌كان ده‌رچووه، به‌ڕێوه‌به‌رایه‌تی گشتی مۆڵه‌تی دایه‌نگه‌ی (شاهانه) له گه‌ڕه‌كی ڕاپه‌ڕین هه‌ڵده‌وه‌شێنێته‌وه، ئه‌وه‌ش وه‌ك توندترین سزا بۆ ئه‌و دایه‌نگایانه‌ی پابه‌ندی سیستم‌و ڕێنمایی دایه‌نگه‌كان نابن.
به پێی ناوه‌ڕۆكی فه‌رمانه‌كه، سزاكه به پێی بڕگه‌ی (1) له مادده‌ی (14)ی ڕێنمایی ژماره (1)ی ساڵی (2015)ی دایه‌نگه‌كان، به‌ڕێوه‌به‌رایه‌تی گشتی بڕیاریدا به:
1ـ هه‌ڵوه‌شاندنه‌وه‌ی مۆڵه‌تی دایه‌نگه‌ی (شاهانه)ی ناحكومی له گه‌ڕه‌كی ڕاپه‌ڕین.
2ـ پێدانی ماوه‌ی یه‌ك مانگ وه‌ك مۆڵه‌ت بۆ گواستنه‌وه‌ی منداڵانی دایه‌نگه بۆ دایه‌نگه‌یه‌كی تر.
3ـ فه‌رمانه‌كه له به‌رواری ده‌رچوونیه‌وه جێ به‌جێده‌كرێت.
به پێی هه‌ردوو ڕێنمایی‌‌و سیستمی دایه‌نگه‌كان، دایه‌نگه‌ی كه‌مته‌رخه‌م سزا ده‌درێت به سزای ئاگاداركردنه‌وه ئه‌گه‌ر كه‌مته‌رخه‌می هه‌بوو، پاش وه‌رگرتنی دوو سزای ئاگاداركردنه‌وه‌ش له كاتی دووباره بوونه‌وه یان ده‌ركه‌وتنی كه‌مته‌رخه‌می تر مۆڵه‌ته‌كه‌ی هه‌ڵده‌وه‌شێنرێته‌وه‌و دایه‌نگه‌كه‌ی داده‌خرێت‌و كه‌سی خاوه‌ن مۆڵه‌تیش بۆی نییه بۆ ماوه‌ی دوو ساڵ داوای مۆڵه‌ت بكات.
به‌مه‌به‌ستی دڵنیابوونه‌وه له دۆخی دایه‌نگه‌كان‌و ڕه‌خساندنی ژینگه‌یه‌كی ته‌ندروست بۆ منداڵه‌كان‌و سه‌لامه‌تیان، به‌شی دایه‌نگه‌كانی به‌ڕێوه‌به‌رایه‌تی گشتی له ڕێگه‌ی لیژنه‌ی تایبه‌ته‌وه سه‌رپه‌رشتی‌‌و به‌دواداچوون بۆ كاری دایه‌نگه‌كان ده‌كات.