به‌ڕێوه‌به‌رایه‌تی گشتی دایه‌نگه‌یه‌ك سزا ده‌دات
به پێی نووسراوی ژماره (578) له 19ی 2ی 2018 كه له‌به‌شی دایه‌نگه‌كانی به‌ڕێوه‌به‌رایه‌تی گشتی ده‌رچووه، به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی سزای (ئاگاداركردنه‌وه) ئاراسته‌ی دایه‌نگه‌ی (سه‌ندریلای ناحكومی) ده‌كات، ئه‌وه‌ش به‌هۆی پابه‌ندنه‌بوونی دایه‌نگه‌ی ناوبراو به یاساو ڕێنمایی‌‌و سیستمی دایه‌نگه‌كانه‌وه.
پاش به‌دواداچوونی لیژنه‌ی سه‌رپه‌رشتی دایه‌نگه‌كان له 7ی 2ی 2018، ده‌ركه‌وتووه دایه‌نگه‌ی (ساندرێلای ناحكومی) كه‌م‌و كورتی هه‌بووه له كاریاندا به ئاستێك كه له‌سه‌ر پێشنیاری لیژنه‌و به‌شی دایه‌نگه‌كان به پێی بڕگه‌ی (1) له مادده‌ی (14)ی ڕێنمایی ژماره(1)ی ساڵی 2015ی وه‌زاره‌تی كارو كاروباری كۆمه‌لایه‌تی بۆ دایه‌نگه‌كان، سزای (ئاگاداركردنه‌وه)ی ئاراسته‌كراوه‌و مۆڵه‌تی (15) ڕۆژی بۆ دیاریكراوه بۆ چاره‌سه‌ركردنی كه‌م‌و كورتییه‌كان.
ئه‌م سزایه له ڕێنماییه‌كه‌دا به سزایه‌كی قورس داده‌نرێت‌و دایه‌نگه مۆڵه‌تی لێ وه‌رده‌گیرێته‌وه ئه‌گه‌ر دوو سزای (ئاگاداركردنه‌وه)ی ئاراسته كرا.
به‌شی دایه‌نگه‌كان له ڕێگه‌ی لیژنه‌ی تایبه‌تمه‌نده‌وه، به به‌رده‌وامی به‌دواداچوون بۆ كاری ڕۆژانه‌ی دایه‌نگه حكومی‌‌و ناحكومییه‌كان ده‌كات‌و له‌كاتی بوونی كه‌م‌و كورتیدا دایه‌نگه‌و به‌ڕێوه‌به‌رو ستافه‌كان ڕێنمایی ده‌كات، ئه‌وه‌ش له پێناو فه‌راهه‌مكردنی ژینگه‌یه‌كی ته‌ندروست بۆ منداڵ له دایه‌نگه‌كاندا.
|