به‌ڕێوه‌به‌رایه‌تی گشتی به‌شداری ۆرك شۆپی (ڕێكاره یه‌كخراوه‌كانی كارپێكردن بۆ خۆپاراستن‌و به‌هاناوه‌چوونی توندوتیژی)
ڕۆژی دووشه‌ممه، 19ی 2ی 2018، به ئاماده‌بوونی به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی ۆرك شۆپێكی تایبه‌ت به (ڕێكاره یه‌كخراوه‌كانی كارپێكردن بۆ خۆپاراستن‌و به‌هاناوه‌چوونی توندوتیژی له‌سه‌ر بنه‌مای جۆری كۆمه‌ڵایه‌تی له هه‌رێمی كوردستانی عێراق) به‌ڕێوه‌چوو.
ۆرك شۆپه‌كه له‌لایه‌ن ڕێكخراوی (UNFPA) بەهاوكاری ڕێكخراوی (CDO) لە هۆتێل تایتانیك ڕێكخرابوو، سه‌ره‌تای ۆرك شۆپه‌كه به وته‌یه‌ك له‌لایه‌ن به‌ڕێز به‌ڕێوه‌به‌ری گشتیه‌وه ده‌ستی پێكرد كه تیایدا ئه‌زموونی به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی بۆ ڕووبه‌ڕووبوونه‌وه‌ی توندوتیژی خسته‌ڕوو، هه‌روه‌ك به كورتیش ئاماژه‌ی به چۆنیه‌تی سودوه‌رگرتنی دامه‌زراوه جیاجیاكانی حكومه‌ت كرد له‌و ستانداردانه‌ی دێنه به‌رهه‌م، هه‌ر له وته‌كه‌یدا به‌ڕێوه‌به‌ری گشتی جه‌ختی له‌وه كرده‌وه چه‌ند یاساو ڕێنماییه‌كان بۆ وه‌ڵامدانه‌وه‌ی توندوتیژییه‌كان گرنگن، هێنده‌و زیاتریش پرسی هوشیاركردنه‌وه‌ی تاك‌و خێزانی كۆمه‌ڵگه‌كه‌كان له توندوتیژی و ئه‌نجامه خراپه‌كانی گرنگترن.
دواتر به‌ڕێز سه‌ركه‌وت عومه‌ر، به‌ڕێوه‌به‌ری به‌ره‌نگاربونه‌وه‌ی توندوتیژی دژی ژن‌و خێزان له سلێمانی ئه‌زموونی خۆی‌‌و به‌ڕێوه‌به‌رایه‌تییه‌كه‌ی له‌و بواره‌دا خسته‌ڕوو.
به‌شداربووانی ۆرك شۆپه‌كه سه‌ره‌ڕای به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی، هه‌ردوو به‌ڕێوه‌به‌رایه‌تی گشتی كۆمه‌ڵایه‌تی هه‌ڵه‌بجه‌ی شه‌هیدو گه‌رمیان ئاماده‌ییان هه‌بوو، هه‌روه‌ها نوێنه‌رانی دامه‌رزاوه ته‌ندروستییه‌كان‌و دادگاكان‌و ڕێكخراوه ناحكومییه‌كان‌و به‌رپرسانی به‌ڕێوه‌به‌رایه‌تی به‌ره‌نگاربوونه‌وه‌ی توندوی تیژی له سلێمانی به‌شداربوون.
ۆرك شۆپه‌كه له‌لایه‌ن خاتوو كارا ئاغا، به‌رپرسی پرۆگرام له نووسینگه‌ی سلێمانی ڕێكخراوی (UNFPA) ی به‌ڕێوه ده‌براو بڕیاره له ئه‌نجامی ئه‌م زنجیره گفتوگۆیانه كۆتا وێنه‌ی ڕێكاره یه‌كخراوه‌كانی كارپێكردن بۆ خۆپاراستن‌و به‌هاناوه‌چوونی توندوتیژی له‌سه‌ربنه‌مای كۆمه‌ڵایه‌تی بخرێته خزمه‌ت دامه‌رزاوه‌و وه‌زاره‌ته‌كانی (كاروكاروباری كۆمه‌ڵایه‌تی، ته‌ندروستی، ناوخۆ، دادگاكان) بۆ كارپێكردن‌و سودلێوه‌رگرتن.