به‌ڕێوه‌به‌رایه‌تی گشتی دایه‌نگه‌كانی توی مه‌لیك‌و لۆڤان‌و گوڵه مێخه‌ك به‌سه‌رده‌كاته‌وه
له‌پێناو چاودێری كردنی دایه‌نگه‌كان‌و زانینی ئاستی كاریان‌و باشتر ئاراسته‌كردنیان‌و دڵنیابوونه‌وه له خزمه‌ته‌كانیان بۆ منداڵان، به سه‌رپه‌رشتی به‌ڕێوه‌به‌ری گشتی وه‌فدێكی به‌ڕێوه‌به‌رایه‌تی گشتی چه‌ند دایه‌نگه‌یه‌ك به‌سه‌رده‌كاته‌وه.
ڕۆژی پێنجشه‌ممه، 28ی 12ی 2017، به‌ڕێز م. عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له‌پارێزگای سلێمانی به هاوڕێیه‌تی به‌ڕێزان خاتوو شه‌وبۆ حه‌مه‌ئه‌مین، شاره‌زای كۆمه‌ڵایه‌تی‌‌و پارێزه‌ر هیوا ڕه‌حمان، به‌رپرسی به‌شی دایه‌نگه‌كان، سه‌ردانی دایه‌نگه‌كانی (تووی مه‌لیكی حكومی، لۆڤانی ناحكومی، گوڵه مێخه‌كی ناحكومی) كرد.
له سه‌ره‌تا به‌ڕێوه‌به‌ری گشتی سه‌ردانی دایه‌نگه‌ی تووی مه‌لیكی كردو دسه‌ستخۆشی له به‌ڕێوه‌به‌رو ستافی دایه‌نگه كرد كه دڵسۆزانه به‌رده‌وامن له خزمه‌تكردنی منداڵان، دواتر وه‌فده‌كه سه‌ردانی دایه‌نگه‌ی لۆڤانی ناحكومی كردو له نزیكه‌وه چاوی به هۆڵ‌و شوێن‌و به‌شه جیاجیاكانی دایه‌نگه كردو ڕێنمایی‌‌و ئاراسته‌ی پێویستی پێشكه‌شكردن‌و ئه‌ركه سه‌ره‌كییه‌كه‌یانی وه‌بیرهێنانه‌وه كه گه‌شه‌پێدانه به توانا جیاجیاكانی منداڵ.
له كۆتا سه‌رداندا، به‌ڕێز به‌ڕێوه‌به‌ری گشتی‌‌و هاوڕێكانی سه‌ردانی دایه‌نگه‌ی گوڵه مێخه‌كی كردو له نزیكه‌وه به‌ش‌و هۆبه‌كان‌و شوێنه‌كانی خواردن‌و خه‌وتن‌و كات به‌سه‌ربردن‌و په‌روه‌رده‌ی منداڵه‌كانی به‌سه‌ركرده‌وه، به‌هۆی باشی ئه‌دای دایه‌نگه‌كه‌شه‌وه به‌ڕێوه‌به‌ری گشتی ده‌ستخۆشی له خاوه‌ن‌و به‌ڕێوه‌به‌رو ستافی دایه‌نگه كرد كه دڵسۆزانه‌ئه‌ركه‌كیان ڕاده‌په‌ڕێنن، هه‌روه‌ك دیزاینی دایه‌نگه‌كه‌و هه‌ڵبژاردنی ڕه‌نگه‌كان‌و ده‌ستنیشانكردنی یاریی‌‌و بابه‌ته په‌روه‌رده‌ییه‌كانی به ئاستێكی به‌رز وه‌سفكرد، هه‌روه‌ك هیواشی خواست دایه‌نگه زیاتر گرنگی به ئاستی ستافه‌كانی بدات‌و ڕۆڵی باشتر بگێڕێت له پرۆسه‌ی گه‌شه‌پێدانی هه‌مه‌لایه‌نه‌ی ژیانی منداڵه‌كان.
به‌ڕێوه‌به‌رایه‌تی گشتی به‌تایبه‌ت له ڕێگه‌ی به‌شی دایه‌نگه‌كانه‌وه به به‌رده‌وامی به دواداچوون ده‌كات بۆ ئاستی دایه‌نگه‌كان‌و ئاراسته‌كردنیان‌و ڕێگه نه‌دان به كه‌م‌و كورتی، ئه‌وه‌ش له پێناو زامنكردنی ژیان‌و خزمه‌تێكی باشتری په‌روه‌رده‌یی‌‌و ده‌روونی‌‌و كۆمه‌لایه‌تی بۆ منداڵانی خوار ته‌مه‌نی چوار ساڵ له دایه‌نگه‌كان.