به‌ڕێوه‌به‌رایه‌تی گشتی سبه‌ی كه‌رنه‌ڤاڵێكی گرنگ ئه‌نجامده‌دات
له ڕۆژی جیهانی خاوه‌ن پێداویستییه تایبه‌ته‌كاندا، سةعات 1ى ثاشنيوةرِؤى سبه‌ی یه‌كشه‌ممه، 3ی 12ی 2017، به‌ڕێوه‌به‌رایه‌تی گشتی بۆنه‌یه‌كی گرنگ بۆ خاوه‌ن پێداویستییه به‌هره‌داره‌كان به‌ڕێوه ده‌بات.
پاش ڕاگه‌یاندنی خه‌ڵاتی (خاوه‌ن به‌هره تایبه‌ته‌كان) له 3ی 12ی 2016، ژماره‌یه‌ك خاوه‌ن پێداویستی تایبه‌ت سیڤی خۆیان پێشكه‌ش كرد بۆ ئه‌وه‌ی ببنه یه‌كێك له براوه‌ی خه‌ڵاتی خاوه‌ن به‌هره تایبه‌ته‌كان، به‌مه‌به‌ستی جیاكردنه‌وه‌ی سیڤییه‌كان‌و پۆلێنكردنی سه‌ركه‌وتووه‌كانیش، به‌ڕێوه‌به‌رایه‌تی گشتی لیژنه‌یه‌كی پێكهێنا له شاره‌زایانی ناو سنوری كاری به‌ڕێوه‌به‌رایه‌تی گشتی‌‌و كه‌سانی ئه‌كادیمی له ده‌ره‌وه‌ی به‌ڕێوه‌به‌رایه‌تی، له ئێسته‌دا به‌ڕێوه‌به‌رایه‌تی گشتی خۆی بۆ ئه‌وه ئاماده ده‌كات سه‌ركه‌وتووانی ئه‌و پڕۆژه‌یه له بۆنه‌یه‌كی شایسته‌دا خه‌ڵات بكات.
به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی له باره‌ی ناوه‌ڕۆك‌و ئامانجی بۆنه‌كه‌وه وتی :" ئامانجی گه‌وره‌ی بۆنه‌‌و پڕۆژه‌كه ئه‌وه‌یه كه ئێمه ده‌مانه‌وێت به خۆمان‌و كۆمه‌ڵگه‌كه‌مان بڵێن خاوه‌ن پێداویستییه تایبه‌ته‌كان به‌شێك ده‌بن له پرۆسه‌ی به‌رهه‌مهێنان ئه‌گه‌ر خانه‌واده یان دامه‌زراوه یان كۆمه‌ڵگه پشتگیرییه‌كی كه‌میان پێشكه‌ش بكات‌و به ئه‌ركی سه‌رشانیان هه‌ستن به‌رانبه‌ریان، ده‌مانه‌وێت بڵێین وێناكردنی خاوه‌ن پێداویستی تایبه‌ت به كه‌سێكی كه‌م توانا یان بار به‌سه‌ر كۆمه‌ڵگه‌وه هه‌ڵه‌یه، ئه‌وه‌تا خاوه‌ن پێداویستی تایبه‌تمان هه‌یه به‌شێكه له پرۆسه‌ی به‌رهه‌مهێنانی ژیان‌و پێشكه‌وتنی كۆمه‌ڵه"، سه‌باره‌ت به ناوه‌ڕۆكی كه‌رنه‌ڤاڵه‌كه‌ش به‌ڕێوه‌به‌ری گشتی به سایتی فه‌رمی به‌ڕێوه‌به‌رایه‌تی گشتی ڕاگه‌یاند:" به ئاماده‌بوونی ژماره‌یه‌ك له ئه‌ندامانی په‌رله‌مان‌و به‌رپرسانی حكومی خه‌ڵاتێكی تایبه‌ت ده‌به‌خشینه 26 هاووڵاتی خاوه‌ن پێداویستی تایبه‌تی سه‌ركه‌وتوو له بواره جۆراوجۆره‌كانی ژیانیاندا".
|