دایه‌نگه‌ی شاری پزیشكانی ناحكومی به فه‌رمی به‌ڕووی منداڵاندا كرایه‌وه
له بۆنه‌یه‌كی فه‌رمیدا‌و به ئاماده‌بوونی به‌ڕێزان به‌ڕێوه‌به‌ری گشتی‌‌و ژماره‌یه‌ك له به‌رپرسانی چاودێری كۆمه‌ڵایه‌تی، دایه‌نگه‌ی شاری پزیشكانی ناحكومی به‌ڕووی منداڵاندا كرایه‌وه.
ڕۆژی چوارشه‌ممه، 1ی 11ی 2017، له بۆنه‌یه‌كی تایبه‌تدا، دایه‌نگه‌ی شاری پزیشكانی ناحكومی له‌لایه‌ن به‌ڕێزان م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی كرایه‌وه‌‌و له بۆنه‌كه‌دا هه‌ریه‌كه له به‌ڕێزان خاتوو سه‌رنج حه‌مه‌سه‌عید، به‌ڕێوه‌به‌ری چاودێری كۆمه‌ڵایه‌تی سلێمانی‌‌و م.هیوا ڕه‌حمان ڕاوێژكاری یاسایی‌‌و خاتوو چۆپی عه‌لی، به‌رپرسی خانه‌ی ساوایان له چاودێری كۆمه‌ڵایه‌تی سلێمانی ئاماده‌بوون.
له‌و بۆنه‌یه‌دا سه‌رجه‌م هۆڵ‌و ژووره‌كانی نانخواردن‌و یاریی‌‌و وانه‌و چالاكییه‌كانی منداڵان به‌سه‌ركرانه‌وه‌و تیایدا به‌ڕێز به‌ڕێوه‌به‌ری گشتی سه‌ره‌ڕای پیرۆزبایی له ده‌ستبه‌كاربوونی دایه‌نگه‌كه، هیوای خواست به كردنه‌وه‌ی خول‌و ڕاهێنانی تایبه‌ت بۆ ستاف‌و داده‌كان تواناییه‌كانی خۆیان بۆ په‌روه‌رده‌و فێركردن‌و ڕاهێنانی منداڵان‌و پاراستنی مافه‌كانیان به‌رزبكه‌نه‌وه، هه‌روه‌ك به‌ڕێوه‌به‌رو داده‌كانیشی ڕاسپارد كه گرنگی زۆر به پیشه‌كه‌یان بده‌ن چونكه ئه‌وان كارێكی هه‌ستیار ئه‌نجامده‌ده‌ن كه به‌رپرسیارێتی پێشكه‌شكردنی خزمه‌تگوزاری فسیۆلۆجی‌‌و كۆمه‌ڵایه‌تی‌‌و په‌روه‌رده‌یی هه‌مه‌لایه‌نه‌یه به‌و منداڵانه‌ی كه له خوار ته‌مه‌نی چوار ساڵه‌وه‌ن، ئه‌وه‌ش پێویسته به ڕێگه‌ی ڕۆشنبیریی‌‌و ته‌رفیهی پێشكه‌وتووه‌وه ئه‌نجامبدرێت.
له‌لای خۆیانه‌وه خاتوو شێنی وه‌ك به‌رێوه‌به‌ری دایه‌نگه‌و م.ڕووبار، وه‌ك خاوه‌نی دایه‌نگه‌یه خۆشحاڵی خۆیان به ئاماده‌بوونی به‌ڕێوه‌به‌ری گشتی ده‌ربڕی‌‌و به‌ڵێنی پابه‌ندی ته‌واویان به یاساو ڕێنماییه‌كان‌و پاراستنی مافی منداڵان دووپاتكرده‌وه.
دایه‌نگه‌ی شاری پزیشكان، دایه‌نگه‌یه‌كی نوێی ناحكومیه‌و ده‌كه‌وێته نێو شاری‌نیشته‌جێبوونی شاری پزیشكانه‌وه له نزیك نه‌خۆشخانه‌ی شۆرش.
|