له كۆمه‌ڵگه‌ی چاودێری كۆمه‌ڵایه‌تی بۆنه‌یه‌كی تایبه‌ت به كۆتایهاتنی خولێكی فێربوونی زمانی ئینگلیزی سازدرا
له هۆڵی بۆنه‌كانی كۆمه‌ڵگه‌ی چاودێری كۆمه‌ڵایه‌تی سلێمانی‌‌و به ئاماده‌بوونی ژماره‌یه‌ك له به‌رپرسان‌و هونه‌رمه‌ندان، ڕێكخراوی هۆرایزن ریلیف بۆنه‌یه‌كی تایبه‌تی به كۆتایی خولێكی زمانی ئینگلیزی هێنا كه له پشتوی هاویندا بۆ منداڵانی نه‌وجه‌وانانی كوڕان‌و كچانیان كردبوویه‌وه.
ڕۆژی شه‌ممه، 28ی 10ی 2017، به ئاماده‌بوونی به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌لایه‌تی له‌پارێزگای سلێمانی‌‌و به‌ڕێزان خاتوو ڕازاو عه‌بدوڵڵا، جێگری به‌ڕێوه‌به‌ری چاودێری كۆمه‌ڵایه‌تی سلێمانی‌‌و م.ئیبراهیم ته‌یب، به‌رپرسی خانه‌ی نه‌وجه‌وانانی كوڕان‌و م.نیان ئیبراهیم، به‌رپرسی خانه‌ی نه‌وجه‌وانانی كچانی سلێمانی‌‌و ژماره‌یه‌ك له هونه‌رمه‌ندان له ناویاندا هه‌ردوو هونه‌رمه‌ندی به توانای بواری كۆمیدی، كاك ماهیر حه‌سه‌ن‌و كاك ئه‌حمه‌د جۆڵا، بۆنه‌یه‌كی تایبه‌ت به كۆتایی هاتنی خولێكی سێ مانگه‌ی فێربوونی زمانی ئینگلیزی سازدرا كه له‌لایه‌ن ڕێكخراوی (هۆرایزن ریلیف)ه‌وه سازكرابوو.
له سه‌ره‌تای بۆنه‌كه‌دا، له‌لایه‌ن به‌ڕێز ئه‌ندازیار میران موحه‌ممه‌د، به‌رپرسی ڕێكخراوه‌وه وته‌یه‌ك پێشكه‌شكراو تیایدا له‌باره‌ی خوله‌كه‌و ئامانجه‌كانی‌‌و ئامانجه‌كانی ڕێكخراوه‌وه قسه‌ی ئاماژه‌ی به ڕێكخراوی كوردستان كرد كه هاوكارو پشتیوانی خوله‌كه بوون.
دواتر به‌ڕێز به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی وته‌یه‌كی پێشكه‌شكردو له وته‌كه‌یدا سه‌ره‌ڕای ده‌ستخۆشی له ڕێكخراوی هۆرایزن‌و هاوكارو هاوڕێكانی‌‌و پشتیوانه‌كانی، ئاماژه‌ی به گرنگی‌‌و ڕۆڵی فێربوون‌و فێربوونی زمان بینی له ڕوونی ئاینده‌ی تاك‌و كۆمه‌ڵدا، هیوای خواست به‌رده‌وام منداڵه چاوگه‌شه‌كانی خانه‌كانی نه‌جه‌وانانی كوڕان‌و كچان وه‌ك هه‌میشه له بۆنه‌ی سه‌ركه‌وتن‌و پڕ خێرو خۆشی‌‌و پڕ ده‌ستكه‌وتتدا ببینین.
پاش پێشكه‌شكردنی ڤیدیۆیه‌ك كه تیایدا چالاكییه‌كانی ڕێكخراو نمایشكران، هونه‌رمه‌ند ماهیر حه‌سه‌ن وته‌یه‌كی پێشكه‌شكردو سه‌ره‌ڕای ده‌ستخۆشی‌‌و هیوای سه‌ركه‌وتن بۆ منداڵه‌كان وه‌ك هه‌میشه خه‌نده‌ی خسته سه‌ر لێوی ئاماده‌بووان.
مه‌راسیمه‌كه به به‌خشینی بڕوانامه‌ی به‌شداربوون به قوتابییه به‌شداربووه‌كان كۆتایی به كاره‌كانی هێنا.
ڕێکخراوی هۆرایزن ریلیف ڕێکخراوێکی ناحکومیی قازانج نەویستە، لە ساڵی (2008) دەستی بەکارەکانی کردووه‌و له 2013 بەشێوەیەکی فەرمی مۆڵەتی لە فەرمانگەی ڕێکخراوە ناحکومییەکان وەرگرتووە‌و لە بوارەکانی تەندروستی، پەروەردە، کلتور، کاردەکات.