حكومه‌ت هه‌ڵسه‌نگاندن بۆ خزمه‌گوزارییه‌كانی وه‌زاره‌ت‌و دامه‌زراوه‌كانی ده‌كات
ئه‌مڕۆ سێشه‌ممه، 10ی 10ی 2017، له هۆڵی شه‌هید سه‌عد عه‌بدوڵڵا له شاری هه‌ولێر، فه‌رمانگه‌ی هه‌ماهه‌نگی‌‌و به‌دواداچوونی حكومه‌تی هه‌رێمی كوردستان ۆرك شۆپێكی بۆ به‌ڕێوه‌به‌ری گشتی‌‌و لیژنه ڕاسپێردراوه‌كانی وه‌زاره‌ته‌كانی كاروكاروباری كۆمه‌ڵایه‌تی‌‌و كشت‌و كاڵ‌و ته‌ندروستی‌‌و شه‌هیدان‌و بازرگانی كرده‌وه به‌مه‌به‌ستی ڕوونكردنه‌وه‌ی ئامانجه‌كانی به‌رنامه‌ی هه‌ڵسه‌نگاندنی خزمه‌تگوزراییه‌كان له‌لایه‌ن حكومه‌ته‌وه.
ۆرك شۆپه‌كه تایبه‌ت بوو به ڕوونكردنه‌وه‌ی ئه‌و پێوه‌رانه‌ی كه فه‌رمانگه‌ی هه‌ماهه‌نگی‌‌و به‌دواداچوون ده‌یگرێته‌به‌ر بۆ هه‌ڵسه‌نگاندنی ئاستی خزمه‌تگوزارییه‌كانی وه‌زاره‌ته جیاجیاكانی حكومه‌تی هه‌رێمی كوردستان پێشكه‌شی ده‌كه‌ن، ئه‌وه‌ش به پێی ستاندارده جیهانییه‌كان.
له سه‌ره‌تای ۆرك شۆپه‌كه‌دا د.نوری عوسمان، سه‌رۆكی فه‌رمانگه‌ی هه‌ماهه‌نگی پێشه‌كییه‌كی سه‌باره‌ت به ۆرك شۆپه‌كه خسته‌ڕوو، پاشان د.هێمن ناوه‌ڕۆكی ئه‌و فۆرم‌و پێوه‌رانه‌ی بۆ ئاماده‌بووان شیكرده‌وه كه به‌هۆیه‌وه پرۆسه‌ی هه‌ڵسه‌نگاندنه‌كه ئه‌نجامده‌درێت، دواتر د.سامی جه‌لال، به‌ڕێوه‌به‌ری گشتی له وه‌زاره‌تی ناوخۆ سیمینارێكی سه‌باره‌ت به په‌یڕه‌وكردنی وه‌زاره‌تی ناوخۆ بۆ به‌رنامه‌ی كوالێتی ناسراو به ئایزۆ (ISO)، هه‌روه‌ك نزیكه‌ی سه‌عاتێكی ۆرك شۆپه‌كه ته‌رخان بوو بۆ گفتوگۆی ئاماده‌بووان‌و وه‌رگرتنی ڕاوبۆچوونی به‌شداربووان.
جێی ئاماژه‌یه وه‌فدێكی وه‌زاره‌تی كارو كاروباری كۆمه‌ڵایه‌تی كه پێكهاتبوو له ژماره‌یه‌ك به‌ڕێوه‌به‌ری گشتی‌‌و به‌ڕێوه‌به‌رو به‌رپرسی په‌یوه‌ندیدار به‌شداری ۆرك شۆپه‌كه بوون.
|