له په‌یمانگاكانی خاوه‌ن پێداویستی تایبه‌ت ساڵی نوێی خوێندن ده‌ستی پێكرد
هاوشێوه‌ی خوێندنگه‌كانی وه‌زاره‌تی په‌روه‌رده، ئه‌مڕۆ دووشه‌ممه، 2ی 10ی 2017، یه‌كه‌م ڕۆژی ساڵی نوێی خوێندن له په‌یمانگاو سه‌نته‌ره‌كانی خاوه‌ن پێداویستی تایبه‌ت سه‌ر به وه‌زاره‌تی كارو كاروباری كۆمه‌ڵایه‌تی ده‌ستی پێكرد.
له شاری سلێمانی‌‌و به ئاماده‌بوونی به‌ڕێزان م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له‌پارێزگای سلێمانی‌‌و م.موحه‌مه‌د سه‌یدقادار، سه‌رپه‌رشتیاری په‌روه‌رده‌یی‌‌و م.عوسمان حه‌مه‌فه‌ره‌ج، به‌ڕێوه‌به‌ری دیوان‌و به‌ڕێوه‌به‌رو مامۆستاو كارمه‌ندان، له په‌یمانگای هیوای نابیستان یه‌كه‌م ڕۆژی ساڵی نوێی خوێندن ده‌ستی پێكرد.
له هه‌رێمی كوردستان، وه‌زاره‌تی كاروكاروباری كۆمه‌ڵایه‌تی خاوه‌نی 5 په‌یمانگاو سه‌نته‌ری تایبه‌ت به خاوه‌ن پێداویستی تایبه‌ته له هه‌رسێ پارێزگای سلێمانی‌‌و هه‌ولێرو دهۆك، كه ئه‌وانیش بریتین له (په‌یمانگای هیوای نابیستان، ڕووناكی بۆ نابینایان، سه‌نته‌ر ئۆتیزم، په‌یمانگای ئاوات بۆ په‌روه‌رده‌ی مێشك، په‌یمانگای هانا بۆ ڕاهێنانی پیشه‌یی، سه‌نته‌ری ڕۆشنایی بۆ نابینایان) له هه‌ردوو په‌یمانگای (هیوا و ڕووناكی) پرۆسه‌ی په‌روه‌رده‌و فێركردن هاوشێوه‌ی وه‌زاره‌تی په‌روه‌رده بۆ نابیستان‌و نابینیان به‌ڕێوه ده‌چێت‌و به هه‌مان پرۆگرامی خوێندن، هه‌روه‌ك خوێندن له هه‌ردوو په‌یمانگا تا نۆیه‌تی بنه‌ڕه‌تیه‌‌و دواتر نابینایان ده‌چنه قۆناغی ئاماده‌یی‌‌و بڕیاریشه له‌م ساڵه‌وه نابیستان له ئاماده‌یی پیشه‌یی وه‌ربگیرێن.
|