ئاماده‌كاری بۆ كۆنفرانسی تایبه‌ت به په‌روه‌رده‌و ڕاهێنانی منداڵانی خاوه‌ن پێداویستی تایبه‌ت ده‌كرێت
له دیوانی به‌ڕێوه‌به‌رایه‌تی گشتی‌‌و به ئاماده‌ی‌بوونی به‌رپرسانی په‌یوه‌ندیدار له به‌ڕێوه‌به‌رایه‌تی گشتی‌‌و به‌رێوه‌به‌رێتی چاودێری كه‌مئه‌ندامان، تاوتوێی كارو به‌رنامه‌ی كۆنفرانسی چاوه‌ڕوانكراوی تایبه‌ت به په‌روه‌رده‌و ڕاهێنانی منداڵانی خاوه‌ن پێداویستی تایبه‌ت كرا.
ڕۆژی یه‌كشه‌ممه، 10ی 9ی 2017، به سه‌رپه‌رشتی به‌ڕێز به‌ڕێوه‌به‌ری گشتی‌‌و ئاماده‌بوونی به‌ڕێزان یاریده‌ده‌رانی به‌ڕێوه‌به‌ری گشتی‌‌و سه‌رپه‌رشتیاری په‌روه‌رده‌یی‌‌و شاره‌زایانی كۆمه‌ڵایه‌تی‌‌و به‌رپرسی به‌شی پلان‌و به‌ڕێوه‌به‌ری چاودێری كه‌مئه‌ندامان‌و به‌رێوه‌به‌رو یاریده‌درانی به‌ڕێوه‌به‌ری په‌یمانگاو سه‌نته‌ره‌كانی (هیوا، ڕووناكی، ئاوات، ئۆتیزم، هانا، ڕۆشنایی)، كۆبوونه‌وه‌یه‌كی تایبه‌ت به ئاماده‌كاری كۆنفرانسی تایبه‌ت به پرۆسه‌ی په‌روه‌رده‌و فێركردن‌و ڕاهێنان بۆ منداڵانی خاوه‌ن پێداویستی تایبه‌ت به‌ڕێوه‌چوو.
ئامانجی كۆبوونه‌وه‌كه گفتوگۆكردن بوو له‌سه‌ر (میكانیزمی كاری كۆنفرانسه‌كه، ئامانجه‌كانی، چۆنیه‌تی به‌ڕێوه‌چوون، به‌شداربووانی كۆنفرانس، كات‌و شوێن، ئه‌گه‌ره‌كانی سه‌ركه‌وتن‌و گرفته‌كانی به‌رده‌م كۆنفرانس).
له پاش گفتوگۆیه‌كی چڕو پڕی ئاماده‌بووان، لیژنه‌یه‌كی باڵا بۆ سه‌رپه‌رشتی كاری كۆنفرانسه‌كه پێكهێنرا‌و بیرۆكه‌ی میكانیزمی كاری كۆنفرانسه‌كه‌و به‌شداربووان‌و ئامانجه‌كانی گه‌لاڵه كران.
جێی ئاماژه‌یه بیرۆكه‌ی به‌ستنی كۆنفرانسێك بۆ ڕێكخستنی كاری په‌روه‌رده‌و فێركردن‌و ڕاهێنان بۆ مندانی خاوه‌ن پێداویستی تایبه‌ت له هه‌رێمی كوردستان ماوه‌یه‌كه لای به‌ڕێوه‌به‌رایه‌تی گشتی گه‌ڵاڵه بووه‌و بڕیاروایه له ئاینده‌دا هه‌نگاوه‌كانی به‌ستنی ئه‌و كۆنفرانسه بچنه بواری جێ به‌جێكردنه‌وه.