هه‌ردوو به‌ڕێوه‌به‌رایه‌تی گشتی كۆمه‌ڵایه‌تی‌‌و ته‌ندروستی سلێمانی كۆبوونه‌وه‌و جه‌خت له‌سه‌ر هه‌ماهه‌نگی كرایه‌وه
شاندێَكی به‌ڕێوه‌به‌رایه‌تی گشتی چاودێری‌‌و گه‌شه‌پێدانی كۆمه‌ڵایه‌تی سلێمانی كه پێكهاتبوو له هه‌ریه‌كه له به‌ڕێزان خاتوو ئه‌ڵوه‌ن عه‌بدولغه‌فوور، به‌ڕێوه‌به‌ری گشتی به وه‌كاله‌ت‌و خاتوو ئاره‌زوو غه‌فوور، به‌رپرسی به‌شی پارێزگاری خێزان‌وخاتوو شیلان عه‌بدوڵڵا، به‌رپرسی شه‌ڵته‌ری داڵده‌دانی ئافره‌تانی هه‌ڕه‌شه‌لێكراو و خاتوو پرشنگ كه‌ریم، به‌رپرسی په‌یوه‌ندییه‌كان سه‌ردانی به‌ڕێوه‌به‌رایه‌تی گشتی ته‌ندروستی سلێمانیان كردو له‌لایه‌ن به‌ڕێز د.میران موحه‌ممه‌دو ژماره‌یه‌ك له به‌رپرسانی به‌ڕێوه‌به‌رایه‌تی گشتییه‌وه پێشوازیكران.
لەوبارەوە لەوتەیەكیدا د.میران محەمەد، بەڕێوبەری گشتی، بۆ ماڵپەری گشتیمان ڕایگەیاند:"وەك بەڕێوبەرایەتی گشتی تەندروستی سلێمانی هەوڵی تەواو دەدەین تاوەكو هاوكارو هەماهەنگی سەنتەری داڵدەدانی ژنانی هەڕەشە لێكراو بین، بەتایبەتی لەڕووی ئاسانكاری كردن بۆ پێشكەشكردنی خزمەتگوزارییە تەندروستییەكان بۆیان لەكاتی سەردانكردنی ناوەندەكانی تەندروستیدا".
لای خۆشییەوە ئارەزوو غەفور، لێپرسراوی بەشی پارێزگاری خێزان لە بەڕێوبەرایەتی گشتی چاودێری و گەشەپێدانی كۆمەڵایەتی بۆ ماڵپەری گشتیمان وتی:"ئامانجمان لەم سەردانە بۆ تەندروستی سلێمانی، گەیاندنی ئەو كێشانەبوو كە لە سەنتەری داڵدەدانی ژنانی هەڕەشە لێكراو ڕوو بەڕوومان دەبێتەوە بەتایبەتی لەڕووی وەرگرتنی خزمەتگوزارییە تەندروستییەكانەوە لەكاتی سەردانكردنی ئەو ژنانەی كە بە هەر هۆكارێكی كۆمەڵایەتی ڕوویان لە سەنتەرەكەمان كردوە بۆ ناوەندە تەندروستییەكان، بۆیە داوای هاوكاریكردنی زیاترمان كرد لە بەڕێوبەری گشتی تەندروستی سلێمانی بەسوپاسەوە بەڵێنی جێبەجێكردنی داواكانی پێداین".
|