به‌ڕێوه‌به‌رایه‌تی گشتی پێشوزای له ڕێكخراوی GIZی ئه‌ڵمانی ده‌كات‌و پڕۆژه‌ی گونجاو پێشنیار ده‌كات
به‌ڕێوه‌به‌رایه‌تی گشتی پێشوازی له ڕێكخراوی به‌ڕێوه‌به‌ری یه‌كه‌ی كوردستانی ڕێكخراوی GIZی ئه‌ڵمانی ده‌كات‌و ژماره‌یه‌ك پڕۆژه پێشنیار بۆ كاركردن له بواری منداڵان‌و خاوه‌ن پێداویستییه تایبه‌ته‌كان ده‌خاته ڕوو.
ڕۆژی دووشه‌ممه، 12ی 6ی 2017، به‌ڕێز م.عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی به ئاماده‌بوونی به‌ڕێز سۆران سه‌عید، به‌رپرسی به‌شی پلان‌و به دواداچوون پێشوازی له خاتوو ( Jenny Hornish) به‌ڕێوه‌به‌ر له یه‌كه‌ی باوكوری عێراق(كوردستان)ی ڕێكخراوی Gizی ئه‌ڵمانی‌‌و هیوا ڕه‌وف، ڕاوێژكاری ڕێكخراوه‌كه كرد.
سه‌ردانی نوێنه‌ری ڕێكخراوی ناوبراو به‌مه‌به‌ستی كۆكردنه‌وه‌ی زانیاریی بوو له‌سه‌ر پڕۆژه‌كانی داهاتووی ڕێكخراوه‌كه له بواری كاری كۆمه‌ڵایه‌تیدا، بۆ ئه‌و مه‌به‌سته‌ش به‌ڕێز به‌ڕێوه‌به‌ری گشتی تواناكانی دامه‌زراوه كۆمه‌ڵایه‌تییه‌كانی سنوری به‌ڕێوه‌به‌رایه‌تی گشتی خسته ڕوو بۆ ئاماده‌ییان بۆ كاركردن له زۆر بواری كاری كۆمه‌ڵایه‌تیدا وه‌ك وه‌ڵامدانه‌وه بۆ پرۆژه‌كانی ڕێكخراوی ناوبراو، به‌تایبه‌ت له بواری به‌گه‌ڕخستن‌و تواناسازی له بواری منداڵان‌و گه‌نجان به‌شێوه‌یه‌كی گشتی‌‌و منداڵان‌و گه‌نجانی خاوه‌ن پێداویستی تایبه‌ت‌و كردنه‌وه‌ی خول‌و ڕاهێنانی جۆراو جۆر بۆ به‌هێزكردنی تواناكانیان.
بڕیاروایه له ئاینده‌یه‌كی نزیكدا ڕێكخراوه‌كه پڕۆژه‌كانی بۆ سنوری پارێزگای سلێمانی بخاته ڕوو، هه‌تا پاڵپشتی دامه‌زراوه‌كانی حكومه‌ت بكات هاوكاتی بوونی ئاواره‌یه‌كی زۆر خزمه‌ته‌كانی خۆیان له بواره جیاجیاكاندا بۆ هاووڵاتیان درێژی پێبده‌ن.
|