پیرۆزبێت 1ی‌ 6، ڕۆژی‌ جیهانی‌ مافه‌كانی‌ منداڵان

به‌بۆنه‌ی‌ 1ی‌ 6، ڕۆژی‌ جیهانی‌ منداڵان به‌ناوی‌ به‌ڕێوه‌به‌رایه‌تی‌ گشتی‌ چاودێریی‌‌و گه‌شه‌پێدانی‌ كۆمه‌ڵایه‌تی‌ له‌پارێزگای‌ سلێمانی‌ جوانترین پیرۆزبایی‌ ئاراسته‌ی‌ منداڵانی‌ كوردستان‌و منداڵانی‌ پارێزگای‌ سلێمانی‌ ده‌كه‌ین، ئومێد ده‌كه‌ین كوردستانی‌ خۆشه‌ویست لانه‌یه‌كی‌ ئارام بێت بۆ منداڵان‌و باوه‌شی‌ خێزانه‌كان‌و دامه‌زراوه‌كان گه‌وره‌ترین ناوه‌ندی‌ په‌روه‌رده‌و فێربوونێكی‌ ڕاست‌و دروست‌و پێشكه‌وتووی‌ دوور له‌ توندوتیژی‌ بێت.

هه‌ر له‌م بۆنه‌یه‌دا خۆمان به‌ خۆشحاڵ ده‌زانین كه‌ له‌ بواری‌ خزمه‌تكردنی‌ منداڵاندا، به‌ڕێوه‌به‌رایه‌تی‌ گشتیمان به‌شدارێكی‌ كارایه‌ به‌ ڕێگه‌ی‌ جیاجیا، به‌تایبه‌ت له‌ ڕێگه‌ی‌ پڕۆژی‌ پاڵپشتی‌ ده‌روونی‌‌و كۆمه‌ڵایه‌تی‌ بۆ منداڵ‌و خێزان كه‌ له‌ماوه‌ی‌ سێ‌ مانگی‌ ڕابردوودا خزمه‌تی‌ جۆراجۆری‌ به‌ زیاتر له‌ (450) منداڵ‌و (100) خێزان كردووه‌ به‌ ڕێگه‌ی‌ پێشكه‌شكردنی‌ خزمه‌تگوزاری‌ ده‌روونی‌‌و كۆمه‌ڵایه‌تی‌‌و په‌روه‌رده‌یی‌‌و یاسایی‌‌و ته‌رفیهی‌‌و فێركاری‌، هه‌روه‌ك به‌ پاره‌ی‌ كاشیش هاوكاری‌ (75) منداڵی‌ كردووه‌ هه‌تا گرفته‌ جۆراوجۆره‌كانیانی‌ پێ‌ چاره‌سه‌ر بكه‌ن، هه‌ر ئه‌م پڕۆژه‌یه‌ له‌ ساڵی‌ 2016دا خزمه‌تی‌ زیاتر له‌ (14) هه‌زار منداڵی‌ كردووه‌ له‌ ناو شاری‌ سلێمانی‌‌و ده‌ربه‌ندیخان‌و چه‌مچه‌ماڵ، ئه‌مه‌ بێجگه‌ له‌ ڕێگه‌ی‌ جۆراوجۆری‌ ترو دامه‌زراوه‌ی‌ تری‌ وه‌ك هێڵی‌ گه‌رمی‌ منداڵان (هێڵی‌ 116)‌و په‌یمانگاو سه‌نته‌ره‌كان‌و خانه‌كان‌و دایه‌نگه‌ حكومی‌و ناحكومییه‌كان كه‌ خزمه‌تێكی‌ به‌رچاو به‌ منداڵان ده‌كه‌ن سه‌ره‌ڕای‌ گرفته‌ جۆراوجۆره‌كان.

له‌ هه‌مان كاتدا ئێمه‌ له‌ به‌ڕێوه‌به‌رایه‌تی‌ گشتی‌ چاودێریی‌‌و گه‌شه‌پێدانی‌ كۆمه‌ڵایه‌تی‌ له‌پارێزگای‌ سلێمانی‌ له‌ ڕوانگه‌ی‌ هه‌ستیاری‌ پرسی‌ منداڵ‌و ئاینده‌ی‌ كه‌ ئاینده‌ی‌ میلله‌ت وابه‌سته‌ی‌ په‌روه‌رده‌‌و ژیانی‌ ئێسته‌ی‌ منداڵانه‌، پێمان وایه‌ كه‌م‌و كورتییه‌كی‌ زۆر هه‌یه‌ له‌ خزمه‌تكردنی‌ منداڵ‌و پاراستنی‌ مافه‌كانیدا له‌ كوردستان‌و سه‌رجه‌م دامه‌زراوه‌كان‌و ڕێكخراوه‌كان‌و خێزانه‌كان پێویسته‌ كاری‌ زیاتر بكه‌ین به‌ ئاراسته‌ی‌ خزمه‌تكردنی‌ منداڵ‌و پاراستنی‌ مافه‌كانی‌‌و ڕه‌خساندنی‌ دۆخێكی‌ شایسته‌ی‌ دوور له‌ توندوتیژی‌ جه‌سته‌یی‌‌و ده‌روونی‌ بۆ ژیانیان تا له‌ هه‌موو بواره‌كاندا به‌ قۆناغێكی‌ گه‌شه‌ی‌ ته‌ندروستدا بڕۆن.

دووباره‌ پیرۆزبێت ڕۆژی‌ 1ی‌ 6 له‌ منداڵان‌و كوردستان ئاوه‌دان‌و ڕوحی‌ شه‌هیده‌كانمان شاد كه‌ له‌ سایه‌یاندا ئاسوده‌ منداڵه‌كانمان ده‌خه‌ون.

ڕاگه‌یاندنی‌ به‌ڕێوه‌به‌رایه‌تی‌ گشتی‌ چاودێریی‌‌و گه‌شه‌پێدانی‌ كۆمه‌ڵایه‌تی‌ له‌پارێزگای‌ سلێمانی‌

1ی‌ 6ی‌ 2017