به‌ڕێوه‌به‌رایه‌تی گشتی گرنگی به زانیاریی‌‌و ئامار ده‌دات‌و بۆ ئه‌و مه‌به‌سته پڕۆگرامێك ده‌خاته كار
وه‌ك به‌شێك له سیاسه‌تی كاركردن، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی، شێوازی كۆكردنه‌وه‌ی زانیاریی‌‌و ڕێكخستنی ئاماری خۆی پێشده‌خات.
ڕۆژی دووشه‌ممه، 17ی 4ی 2017، به‌شی پلان‌و به‌دواداچوون كۆبوونه‌وه‌یه‌كی فراوانی له‌گه‌ڵ به‌رپرسی هۆبه‌و كارمه‌ندانی داتاو ئایتی به‌ڕێوه‌به‌رایه‌تییه‌كانی سنوری كاری خۆی به‌ڕێوه‌برد.
له سه‌ره‌تای كۆبوونه‌وه‌كه‌دا، ئۆران سه‌عید به‌رپرسی به‌شی پلان‌و به دواداچوون ئامانجه‌كانی كۆبوونه‌وه‌كه‌ی خسته‌ڕوو، هه‌روه‌ك شێوازی چۆنییه‌تی په‌یوه‌ندی‌‌و گرنگیدان به گه‌یاندنی داتاو زانیارییه‌كان‌و ورده‌كاری كاره‌كان بۆ به‌شداربوان خسته‌ڕوو.
به‌مه‌به‌ست ئاگابوون له چۆنیه‌تی كارو ئاراسته‌كردنی به‌ش‌و كارمه‌ندانی به‌ڕێوه‌به‌رێتییه‌كان، به‌ڕێز م.عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی به‌شداری به‌شێكی كۆبوونه‌وه‌كه‌ی كرد، له وته‌یه‌كیدا بۆ به‌شداربووانی كۆبوونه‌وه‌كه بایه‌خی گرنگیدان به زانیاریی‌‌و داتا له سه‌رده‌مێكدا كه به‌سه‌رده‌می ته‌قینه‌وه‌ی زانیارییه‌كان ناسراوه بۆ ئاماده‌بووان شیكرده‌وه، هه‌روه‌ك بۆ هه‌موو لایه‌كی ڕوونكرده‌وه كه به‌ڕێوه‌به‌رایه‌تی گشتی ده‌یه‌وێت باشتر كاری داتاو ئاماری خۆی ڕێكبخات‌و زانیارییه‌كان باشتر كۆ بكاته‌وه تا له كاتی پێویستبوون بۆ بڕیاردان یان خستنه‌ڕووی زانیارییه‌كان بۆ ڕای گشتی‌‌و ڕۆژنامه‌نووسان پرۆسه‌كه پێشكه‌وتوو بێت‌و هیچ كه‌لێن‌و كه‌م‌و كورتییه‌ك له داتاو ئامارو زانیارییه‌كاندا نه‌مێنێته‌وه.
دواتر‌و له به‌شێكی كۆبوونه‌وه‌كه‌دا به‌رێز ئاودێر عه‌بدوڕه‌زاق، به‌رپرسی هۆبه‌ی ئامارو ئایتی له دیوانی به‌ڕێوه‌به‌رایه‌تی گشتی ئه‌و پڕۆگرامه نوێیه‌ی بۆ ئاماده‌بووان‌و شێوازی كاركردنی خسته‌ڕوو، به‌شداربووانیش به بایه‌خه‌وه به‌شداری كۆبوونه‌وه‌كه‌بوون‌و بڕیاردرا له ئاینده‌دا باشتر له جاران‌و به‌شێوازێكی نوێ پرۆسه‌ی كۆكردنه‌وه‌ی زانیاریی‌‌و داتاو به دۆكیومێنتكردنی به‌ڕێوه بچێت.