به‌ڕێوه‌به‌ری گشتی ڕێكخراوو سه‌نته‌ری شین بۆ ئۆتیزم به‌سه‌رده‌كاته‌وه
به‌مه‌به‌ستی بینینی كاره‌كانیان‌و له نزیكه‌وه ئاگابوون له شێوازی ڕاهێنانه‌كانیان بۆ منداڵانی ئۆتیزم، به‌ڕێوه‌به‌ری گشتی سه‌نته‌رو ڕێكخراوی شین بۆ ئۆتیزم به‌سه‌ر ده‌كاته‌وه.
ڕۆژی پێنجشه‌ممه، 6ی 4ی 2017، به‌ڕێز م.عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی به هاوڕێیه‌تی به‌رپرسانی به‌شه‌كانی پارێزگاری خێزان‌و پلان‌و به دواداچوون‌و هۆبه‌ی پاراستنی منداڵ له دیوانی به‌ڕێوه‌به‌رایه‌تی گشتی، سه‌ردانی ڕێكخراوو سه‌نته‌ری شین بۆ ئۆتیزمی كردو له‌لایه‌ن به‌ڕێز م.ئاشنا ئه‌حمه‌د، به‌ڕێوه‌به‌ری ڕێكخراوو ستافی ڕێكخراوو سه‌نته‌ره‌وه پیشوازیكرا.
به‌ڕێوه‌به‌ری گشتی له‌و سه‌ردانه‌یدا گوێبیستی شێوازی كاركردنی ڕێكخراوو سه‌نته‌ره‌كه بوو له بواری ڕاهێنانی منداڵانی ئۆتیزم، هه‌روه‌ك له نزیكه‌وه تواناكانی سه‌نته‌ری بینی له خزمه‌تكردن‌و ڕاهێنانی منداڵاندا، هه‌روه‌ها سه‌ردانی سه‌رجه‌م هۆڵ‌و پۆله‌كانی كردو ئاستی پێشكه‌وتنه‌كانی منداڵانی بینی، دواتر ده‌ستخۆشی له به‌ڕێوه‌به‌رو ستافه‌كانی سه‌نته‌رو ڕێكخراوی شین كرد كه دڵسۆزانه كاره‌كانیان ئه‌نجامده‌ده‌ن‌و هاوكارو پاڵپشتی خانه‌واده‌كانی ئۆتیزمن.
هه‌ر له وته‌كه‌یدا به‌ڕێوه‌به‌ری گشتی جه‌ختی له دروستكردنی بۆردو ئه‌ڵقه‌یه‌كی كاری هه‌ماهه‌نگی كرده‌وه تا تواناكانی بواری په‌روه‌رده‌و ڕاهێنانی منداڵانی ئۆتیزم كۆبكرێنه‌وه له سنوری پارێزگای سلێمانی به مه‌به‌ستی باشتر خزمه‌تكردن‌و بیركردنه‌وه‌ی دروست له‌و ژماره زۆره‌ی منداڵی ئۆتیزم كه سه‌ره‌ڕای منداڵان خێزانه‌كانیانیشیان ده‌بنه قوربانی‌‌و له‌به‌رده‌م بارگرانییه‌كی قورسدان، ئه‌وه‌ش به مه‌به‌ستی كۆكردنه‌وه‌ی زانیاریی ته‌واو تا قه‌باره‌ی گرفته‌كه باشتر بزانرێت‌و باشتر تواناكانی دامه‌زراوه‌كانی په‌روه‌رده‌و ته‌ندروستی‌‌و كۆمه‌ڵایه‌تی بۆ خزمه‌تی منداڵان ئاراسته بكرێن.
|