وه‌ك به‌شێك له شه‌فافیه‌ت‌و ده‌سته‌به‌ركردنی به‌ڕێوه‌بردنی باش به به‌كارهێنانی ته‌كنه‌لۆجیا بۆ هاووڵاتیان، به‌ڕێوه‌به‌رایه‌تی گشتی فۆرمی مۆڵه‌تی به‌خێوكار له ڕێگه‌ی وێبسایتی خۆیه‌وه ده‌خاته به‌رده‌ست هاووڵاتیان، تا له شوێنی خۆیانه‌وه بتوانن وه‌ریگرن‌و بزانن پێویستییه‌كان‌و ڕێوشوێنه‌كانی وه‌رگرتنی مۆڵه‌ته‌كه چۆنه‌و پێویسته چی بكه‌ن‌و سه‌ردانی كوێ بكه‌ن.
مۆڵه‌تی به‌خێوكه‌ر، یان خۆته‌رخانكه‌ر بۆ به‌خێوكردنی خاوه‌ن پێداویستییه‌كی تایبه‌تی په‌ككه‌وته، یه‌كێك له ئاسانكاری‌‌و پشتیوانییه‌كانی وه‌زاره‌تی كارو كاروباری كۆمه‌ڵایه‌تییه، كه به‌هۆیه‌وه پشتیوانی ئه‌و خێزانانه ده‌كرێت كه ئه‌ندامێكی خێزانه‌كه‌یان پێویستی به‌هاوكارییه بۆ به‌ڕێكردنی ژیانی ڕۆژانه‌ی.
مۆڵه‌ته‌كه به‌پێی یاسای ژماره 22ی ساڵی 2011 ی په‌رله‌مانی كوردستان، هه‌روه‌ها ڕێنمایی ژماره 2ی ساڵی 2016ی وه‌زاره‌تی كاروكاروباری كۆمه‌ڵایه‌تی ده‌درێت به هه‌ركه‌سێك خۆی ته‌رخان بكات بۆ به‌خێوكردنی هاووڵاتیه‌ك كه پێویستی به به‌خێوكردنی‌‌و چاودێریكردن هه‌بێت‌و ئه‌و پێویستییه‌ش به‌پێی ڕاپۆرتی پزیشكی سه‌لمێنرابێت.
بۆ وه‌رگرتنی مۆڵه‌ته‌كه‌و له‌كاتی پڕكردنه‌وه‌ی فۆرمه‌كه پێویسته هاووڵاتیان ئاگاداری ئه‌م تێبینیانه بن:
1ـ به‌پێی ڕێنمایی ژماره (1)ی ساڵی (2016)، ئه‌و هاووڵاتیانه‌ی داوای مۆڵه‌تی به‌خێوكه‌ر ده‌كه‌ن بۆ په‌ككه‌وته‌كانیان، پێویسته رێژه‌ی كه‌مئه‌ندامی په‌ككه‌وته یان خاوه‌ن پێداویستییه تایبه‌ته‌كانیان له سه‌دا سه‌د (%100) بێت، بێجگه له (ئۆتیزم‌و داون سه‌ندرم‌و بیركۆڵ) كه به‌ڕێژه‌ی له سه‌دا هه‌شتا (%80) مافی وه‌رگرتنی مۆڵه‌تیان هه‌یه.
2ـ بۆ منداڵانی خوار ته‌مه‌نی (12 ساڵ) مه‌رجه مۆڵه‌ت به (دایك) بدرێت، ئه‌گه‌ر هاتوو كه‌سێكی تر له خێزانه‌كه ویستی ئه‌و مۆڵه‌ته داوا بكات پێویسته هۆكارێكی بڕواپێهێنه‌ر بخرێته ڕوو.
3ـ ئه‌و كه‌سه‌ی مۆڵه‌ت ده‌درێت بۆ به‌خێوكردنی په‌ككه‌وته‌كه‌ی مه‌رجه خۆی یه‌كلابكاته‌وه بۆ كاری به‌خێوكارییه‌كه‌ی‌‌و خزمه‌ت‌و چاودێریی په‌ككه‌وته‌كه‌ی بكات، به پێچه‌وانه‌وه خۆی به‌رپرسیار ده‌بێت له‌به‌رده‌م لیژنه‌كانی به‌دواداچوون له هه‌ر كه‌مته‌رخه‌مییه‌ك‌و ناڕاستیه‌ك له زانیارییه‌كان.
4ـ پێویسته له‌گه‌ڵ فۆرمه‌كه وێنه‌یه‌ك له به‌ڵگه‌نامه پێویسته‌كان، وه‌ك: (ڕاپۆرتی پزیشكی، ناسنامه‌ی باری شارستانی، كارتی نیشتیمانی یان زانیاریی، نووسراوی پشتگیریی ئه‌و به‌ڕێوه‌به‌رایه‌تیه‌ی داواكار تیایدا فه‌رمانبه‌ره، وێنه‌ی داواكارو په‌ككه‌وته‌كه‌ی) هاوپێچ بكرێن.
له‌ساڵی ڕابردوودا له سنوری پارێزگای سلێمانی نزیكه‌ی 800 هاووڵاتی مۆڵه‌تی به‌خێوكاریان وه‌رگرتووه بۆ به‌خێوكردنی منداڵ یان په‌ككه‌وته‌كانیان، مۆڵه‌ته‌كه به خزمه‌ت ئه‌ژمارده‌كرێت‌و زۆرینه‌ی ده‌رماڵه‌كانیشی له‌گه‌ڵدایه.
هاووڵاتیان له‌كاتی پێویستیان بۆ مۆڵه‌ته‌كه، چ مۆڵه‌تی نوێ یان نوێكردنه‌وه، ده‌توانن سه‌ردانی هه‌ردوو به‌شی ڕاپۆرت‌و یاساو رێنمایی له سایتی به‌ڕێوه‌به‌رایه‌تی گشتی بكه‌ن‌و فۆرمه‌كه وه‌ربگرن.