به‌رهه‌مهێنانی دۆكیومێنتی ئاراسته‌كاری (باشترین‌و خراپترینی یارییه‌كانی منداڵ له بازاره‌كانی كوردستاندا)
به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، سه‌رقاڵی كاركردنه له پڕۆژه‌یه‌كی گرنگدا سه‌باره‌ت به به‌رهه‌مهێنانی دۆكیومێنتی ئاراسته‌كاری "باشترین‌و خراپترینی یارییه‌كانی منداڵ له بازاره‌كانی كوردستاندا".
پڕۆژه‌كه له‌لایه‌ن هۆبه‌ی پاراستنی منداڵ له به‌شی پارێزگاری خێزان سه‌رپه‌رشتیده‌كرێت‌و له ئێسته‌دا قۆناغی یه‌كه‌می كه بریتییه له ڕووپێوییه‌ك بۆ زانینی جۆری ئه‌و یارییه جۆراوجۆرانه‌ی له بازاڕو ماركێته‌كاندا به‌رده‌ستن ته‌واو بووه‌‌و ئاماده‌یه، قۆناغی داهاتووشی بریتییه له ۆرك شۆپێك له‌سه‌ر گه‌ڵاڵه‌كردنی بۆچوونێكی زانستی به ئاماده‌بوونی توێژه‌رانی كۆمه‌ڵایه‌تی‌‌و ده‌روونی كه به سه‌رپه‌رشتی ئه‌ڵوه‌ن عه‌بدولغه‌فوور، جێگری به‌ڕێوه‌به‌ری گشتی‌‌و به چاودێری ڕاسته‌وخۆی به‌ڕێز به‌ڕێوه‌به‌ری گشتی له ڕۆژانی ئاینده‌دا به‌ڕێوه ده‌چێت.
ئامانجی پڕۆژه‌كه ده‌ستنیشانكردنی یارییه باش‌و خراپه‌كانی بازاره‌كانی كوردستانه، هه‌روه‌ها ده‌ستنیشانكردنی كاریگه‌رییان له‌سه‌ر لایه‌نی جه‌سته‌یی‌‌و په‌روه‌رده‌یی‌‌و ده‌روونی‌‌و كۆمه‌ڵایه‌تی منداڵ، هه‌روه‌ك گه‌ڵاڵه‌كردنی بۆچوونێك بۆ دامه‌زراوه په‌یوه‌ندیداره‌كان هه‌تا ئاسانكاری هێنان‌و فرۆشتنی كام جۆره یارییانه بكرێت كه له‌به‌رژه‌وه‌ندی منداڵدان له‌لایه‌ك، له‌لایه‌كی تره‌وه خێزانه‌كان به‌رچاو ڕوون بن له‌وه‌ی كام جۆره یارییانه بۆ منداڵه‌كانیان بكڕن‌و به‌كایبهێنن.
|