به‌مه‌به‌ستی به‌شداریپێكردنی كادیرانی پێشكه‌وتووی سنوری به‌ڕێوه‌به‌رایه‌تی گشتیمان له هه‌ڵسه‌نگاندنی كاره‌كان‌و پێشنیاری پلانی ستراتیجی له سنوری ئه‌رك‌و ده‌سه‌ڵاتی به‌ڕێوه‌به‌رایه‌تی گشتیدا، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، بڕیاریدا به پێكهێنانی بۆردێكی ڕاوێژكاری.
به‌مه‌به‌ستی هه‌ڵسه‌نگاندنی كاره‌كان‌و داڕشتنی پلانی ستراتیجی‌‌و گه‌ڵاڵه‌كردنی بۆچوونی به‌سود له خزمه‌ت پێشخستنی كاردا، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی بۆردێكی ڕاوێژكاری پێكده‌هێنێت‌و ئه‌ندامبوون تیایدا خۆویستانه‌یه.
به پێی نووسراوی ژماره (588) له 20ی 2ی 2017ی كه ئاراسته‌ی گشت به‌ڕێوه‌به‌رێتییه‌كان كراوه، به‌ڕێوه‌به‌رایه‌تی گشتی بڕیاریدا به پێكهێنانی بۆردێكی ڕاوێژكاری له سنوری كاری به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، ئه‌ندامانی ئه‌و بۆرده‌ش پێكدێن له:
1ـ هه‌ڵگرانی بڕوانامه‌ی خوێندنی باڵا (ماسته‌رو دكتۆرا) له بواره جیاجیاكاندا.
2ـ هه‌ڵگرانی بڕوانامه‌ی دیپلۆم‌و به‌كالۆریۆس كه (15 ساڵ) خزمه‌تیان هه‌یه له كاری كۆمه‌لایه‌تیدا.
3ـ بوار‌و پسپۆڕییه‌كانی به‌شداریكردن وه‌ك ئه‌ندام له بۆرده‌كه‌دا پێكدێن له ( توێژه‌رانی كۆمه‌ڵایه‌تی‌‌و ده‌روونی، یاسایی، پزیشكی، په‌روه‌رده‌یی، ئه‌ندازیاری).
ئه‌ندام بوون له‌م بۆرده‌دا خۆویستانه‌یه‌و ئه‌و به‌ڕێزانه‌ی ده‌یانه‌وێت به‌شداربن له ڕێگه‌ی ناردنی ناوه‌كانیانه‌وه له ڕێگه‌ی به‌ڕێوه‌به‌رێتییه‌كانیانه‌وه خۆیان تۆمار ده‌كه‌ن‌و بڕیاروایه پاش پێكهاتنی ئه‌م بۆرده 3 مانگ جارێك دانیشتنی ئاسایی خۆی ئه‌نجامبدات‌و یه‌كه‌م دانیشتیشی له مانگی 4ی 2017دا ده‌بێت.
جێی ئاماژه‌یه به‌ڕێوه‌به‌رایه‌تی گشتی مه‌به‌ستییه‌تی له ڕێگه‌ی زۆرترین ڕاوێژه‌وه سود له كارمه‌ندانی به توانای خۆی وه‌رگرێت‌و له پێناو گه‌شه‌پێدانی زیاتری دامه‌زراوه‌ی كۆمه‌ڵایه‌تییدا به‌كاریان بهێنێت كه دواجار كاریگه‌ری ئه‌رێنیان له‌سه‌ر كاره‌كانی به‌ڕێوه‌به‌رایه‌تی گشتی‌‌و به‌ڕێوه‌به‌رایه‌تییه‌كانی سنوری ده‌سه‌ڵاتی ده‌بێت.