پێشنیوه‌ڕۆی ئه‌مڕۆ یه‌كشه‌ممه، 17ی كانونی دووه‌می 2016، وه‌فدێكی به‌ڕێوه‌به‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی به‌سه‌ر په‌رپه‌شتی عومه‌ر گوڵپی به‌ڕێوه‌به‌ری گشتی‌‌و به هاوڕێیه‌تی ژماره‌یه‌ك له به‌رپرسانی دیوانی به‌ڕێوه‌به‌رایه‌تی گشتی‌‌و به‌ڕێوه‌به‌رێتییه‌كانی تری كۆمه‌لایه‌تی له شاری سلێمانی، له‌گه‌ڵ دكتۆر ئاسۆ فه‌ره‌یدون پارێزگاری سلێمانی له دیوانی پارێزگا كۆبوویه‌وه .
له‌و كۆبوونه‌وه‌یه‌دا كه نزیكه‌ی سه‌عاتێكی خایاند به وردی تیشكی خسته سه‌ر كاروچالاكیی‌و پڕۆژه‌كانی دامه‌زراوه كۆمه‌ڵایه‌تییه‌كان له ساڵی ڕابردوودا، هه‌روه‌ك باسی له گیروگرفتی خاوه‌ن پێداویستییه تایبه‌ته‌تییه‌كان كرد، هه‌روه‌ها ئاماژه‌ی به خاڵه به‌هێزو لاوازه‌كانی خانه‌كانی له خۆگرتنی ساوایان‌و منداڵان‌و به‌ساڵاچووان‌و ئافره‌تانی هه‌ڕه‌شه‌لێكراو كرد، ئه‌مه جگه له باسكردن له ته‌واوبوونی هه‌ردوو پڕۆژه‌ی دایه‌نگه‌ی به‌ختیاری‌‌و دایه‌نگه‌ی چوارباخ له ساڵی ڕابردوودا، هه‌روه‌ها قۆناغه‌كانی پڕۆژه‌ی دروستكردنی بینای سه‌نته‌ری ئۆتیزم كه قۆناغی باشی بڕیوه‌و یه‌ك له پڕۆژه ئومێدبه‌خشه‌كان به‌و منداڵ‌و خێزانانه‌ی منداڵی ئۆتیزمیان هه‌یه .
هه‌روه‌ها له ته‌وه‌رێكی كۆبوونه‌وه‌كه‌دا به بایه‌خه‌وه باسی خۆڕاگری كارمه‌ندان كرا له دامه‌زراوه كۆمه‌ڵایه‌تییه‌كاندا كه سه‌ره‌ڕای قه‌یرانی دارایی به‌رده‌وامن له خزمه‌تی پیرو په‌ككه‌وته‌و منداڵانی بێناز، له‌م ڕووه‌وه ماندووبوونیان به‌رزنرخێنراو .
له‌به‌رانبه‌ردا پارێزگاری سلێمانی سوپاسی ئاماده‌بووانی كۆبوونه‌وه‌كه‌ی كردو به‌ڵێنی هاوكاریو پشتیوانی به به‌ڕێوه‌به‌رایه‌تی گشتی‌‌و به‌ڕێوه‌به‌رایه‌تییه‌كانی تری كۆمه‌ڵایه‌تی داو بڕیاریدا دوو له‌و كێشانه‌ی خرانه ڕوو چاره‌سه‌ر بكات‌و له هه‌فته‌ی ئاینده‌شدا له نزیكه‌وه سه‌ردانی دامه‌زراوه كۆمه‌ڵایه‌تییه‌كان بكات .
