پێشانگایه‌كی شێوه‌كاری بۆ دوو هونه‌رمه‌ندی خاوه‌ن پێداویستی تایبه‌ت كرایه‌وه
ئه‌مڕۆ سیشه‌ممه، 30ى 1ى 2017، له هۆڵی مۆزه‌خانه‌ی ئه‌منه سووره‌كه، پێشانگای هاوبه‌شی هه‌ردوو هونه‌رمه‌ندی شێوه‌كاری به‌توانای خاوه‌ن پێداویستی تایبه‌ت، ئه‌فراح ئیبراهیم، له گه‌رمیان‌و لهۆن فه‌ریح، له پارێزگای هه‌ڵه‌بجه.
له‌و پێشانگایه‌دا كه هه‌ردوو ڕێكخراوی كۆمه‌ڵه‌ی رۆژو ڕۆحی تۆپی پێی جیهانی پێی هه‌ستابوون، هه‌ردوو هونه‌رمه‌ند ژماره‌یه‌ك له كاره هونه‌رییه‌كانی خۆیان پێشكه‌شكرد كه‌تیایاندا ده‌ستڕه‌نگینی‌‌و توانای هونه‌ری خۆیان پیشاندابوو.
له سه‌ردان‌و به‌سه‌ركردنه‌وه‌یدا بۆ پێشانگاكه عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی پیرۆزبایی‌‌و ده‌ستخۆشی ئاراسته‌ی هه‌ردوو هونه‌رمه‌ندو ڕێكخراوه‌كانیان كرد، هه‌روه‌ها له لێداونیشیدا بۆ كه‌ناڵه‌كانی ڕاگه‌یاندن سه‌رسامی خۆی به‌كاره‌كانیان ده‌ربڕی‌‌و وتی :" ئه‌م پێشانگایه سه‌ره‌ڕای ئه‌وه‌ی توانای دوو هونه‌رمه‌ندی تێدا ده‌ركه‌وتووه په‌یامێكیشه بۆ كۆمه‌ڵگه تا ئهو وێنه‌یه‌ی كه جاروباری به هه‌ڵه ده‌كێشرێت بۆ خاوه‌ن پێداویستی تایبه‌ت ڕاستبكرێته‌وه‌و هه‌موو بزانین كه ئه‌گه‌ر خێزان‌و كۆمه‌ڵگه‌و حكومه‌ت‌و ڕێكخراوه‌كان پشتیوان بن ئه‌وه هاووڵاتیانی خاوه‌ن پێداویستی تایبه‌ت به شێكن له پرۆسه‌ی به‌رهه‌مهێنان‌و پێشخستنی وڵات".
جێی ئاماژه‌یه هه‌ردوو هونه‌رمه‌ندی به توانا، سه‌ره‌ڕای ئه‌م پێشانگایه ژماره‌یه‌كی تر پێشانگای هاوبه‌شیان به‌سه‌ركه‌‌وتوویی كردووته‌وه له شاره‌كانی هه‌ڵه‌بجه‌و گه‌رمیان.
|