ڕاگه‌یه‌نراوێك له باره‌ی كه‌یسی ئهو منداڵه‌ی توندوتیژی به‌رانبه‌ر كرابوو
به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی به پێویستی ده‌زانێت هه‌موو لایه‌ك ئاگاداربكاته‌وه كه له ڕێگه‌ی به‌ش‌و به‌ڕێوه‌به‌رێتییه تایبه‌تمه‌نده‌كانه‌وه به پێی ئه‌ركه چاوه‌ڕوانكراوه‌كانی سه‌رشانمان به هاوكاری ده‌زگا په‌یوه‌ندیداره‌كانی تر به دواداچوونی ته‌واو ده‌كه‌ین بۆ كه‌یسی ئهو منداڵه‌ی له شاری ده‌ربه‌ندیخان به‌ناوی (م.أ)، ته‌مه‌ن 4 ساڵ، توندوتیژی به‌رانبه‌ر كرابوو.
له‌و باره‌یه‌وه ئێمه له ئێسته‌دا ده‌توانین ئه‌وه بڵێین كه كه‌یسی ئهو منداڵه له‌لایه‌ن كارمه‌ندێكی دڵسۆزی به‌ڕێوه‌به‌رایه‌تیمانه‌وه له شاری ده‌ربه‌ندیخان خراوه‌ته به‌رده‌ست به‌ڕێزان له دادگاو پۆلیسی ده‌ربه‌ندیخان، كه له دۆخێكی نادیاردا منداڵێك به ده‌ست‌و قاچی به‌ستراوه‌وه‌‌و پاش شكانی قاچی له‌ماڵێدا له دۆخ‌و دیمه‌نێكی دوور له مافی مرۆڤ‌و دڵره‌قانه‌و بێ به‌زه‌ییانه له‌گه‌ڵ ئه‌ندامانی خێزانه‌كه‌ی ده‌ژیا، ئه‌وه‌ی په‌یوه‌ندی به دیاریكردنی كه‌سانی تۆمه‌تبارو كه‌مته‌رخه‌م‌و هۆكاره‌كانی پشت ئه‌م ڕه‌فتاره‌وه هه‌یه له پرۆسه‌كانی لێكۆڵینه‌وه‌‌و دادبینیدا دیاریده‌كرێن كه به‌ڕێزان له دادگاو پۆلیسی ده‌ربه‌ندیخان تیایدا كارده‌كه‌ن، له ڕووی ته‌ندروستیشه‌وه پزیشكه دڵسۆزه‌كان ئه‌وه‌ی پێویست بێت بۆ ژیانی ئهو منداڵه ئه‌نجامی ده‌ده‌ن.
ڕاگه‌یاندنی به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی
29ی 1ی 2017
|