به‌مه‌به‌ستی ڕێكخستنی ده‌وام‌و میلاكی كارمه‌ندان‌و كاری خانه‌كان كۆبوونه‌وه‌یه‌ك به‌ڕێوه‌چوو
به مه‌به‌ستی ڕێكخستنی باشتری كاری خانه‌كان، دیاریكردنی گرفته‌كان‌و چۆنییه‌تی مامه‌ڵه له‌گه‌ڵ صندوقی هاوكاری كۆمه‌ڵایه‌تی سلێمانی، به‌ڕێوه‌به‌ری گشتی سه‌رپه‌رشتی كۆبوونه‌وه‌یه‌كی تایبه‌تی كرد‌و تیایدا بڕیاری پێویست درا.
ڕۆژی یه‌كشه‌ممه، 22ی 1ی 2017، به سه‌رپه‌رشتی عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانیو ئاماده‌بوونی هه‌ریه‌كه له ئاشتی ئیبراهیم، جێگری به‌ڕێوه‌به‌ری گشتی بۆ كاروباری كارگێڕی‌‌و دارایی‌‌و گه‌شاو عومه‌ر، شاره‌زای دارایی له دیوانی به‌ڕێوه‌به‌رایه‌تی گشتی‌‌و لیژنه‌ی هه‌ڵسه‌نگاندنی داواكاری بۆ خه‌رجكردن له صندوقی هاوكاری كۆمه‌ڵایه‌تی، كۆبوونه‌وه‌یه‌كی تایبه‌ت به ڕێكخستنی باشتری میلاك‌و زانینی كه‌م‌و كورتییه‌كان‌و شێوازی خه‌رجكردن به پێی پێویستییه‌كان له صندوقی هاوكاری كۆمه‌ڵایه‌تی سلێمانی به‌ڕێوه‌چوو.
له‌و كۆبوونه‌وه‌یه‌دا كه هه‌ریه‌كه له به‌ڕێوه‌به‌ری چاودێریی كۆمه‌ڵایه‌تی سلێمانیو به‌رپرسی هۆبه‌ی ژمێریاری‌‌و به‌رپرسی هۆبه‌و خانه‌كانی ساوایان‌و كوڕان‌و كچان‌و به‌ساڵاچووان له به‌ڕێوبه‌رێتی چاودێری كۆمه‌ڵایه‌ت سلێمانیو شه‌ڵته‌ری داڵده‌دانی ئافره‌تانی هه‌ڕه‌شه‌لێكراو ئاماده‌یبوون، گفتوگۆی تێروته‌سه‌ل كرا له‌سه‌ر ئه‌و گرفتانه‌ی له‌میلاكی هه‌ریه‌كه له خانه‌كانی له خۆگرتندا هه‌یه، هه‌روه‌ها چۆنییه‌تی پڕكردنه‌وه‌ی‌‌و زانینی ئاستی پێویستی منداڵان‌و به‌ساڵاچووان‌و ئافره‌تان به صندوقی هاوكاری كۆمه‌ڵایه‌تی، له‌باره‌ی ئه‌و پرسانه‌شه‌وه به پێی به‌رژه‌وه‌ندی گشتی‌‌و بنه‌مای ئه‌مانه‌تپارێزی‌‌و ڕێگرتن له به‌هه‌ده‌ردان بڕیاری پێویست له خزمه‌تی خانه‌كاندا بۆ ساڵی 2017 درا.
|