به ئاماده‌بوونی هه‌ریه‌كه له قائمقامی ده‌ربه‌ندیخان‌و به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی سلێمانی به‌شی پارێزگاری خێزان له دیوانی به‌ڕێوه‌به‌رایه‌تی گشتی به‌هاوكاری سه‌نته‌ری پاراستن‌و چالاكی منداڵانی ده‌ربه‌ندیخان فیستیڤاڵێكی هونه‌رو گۆڕانی‌‌و سرودی نیشتیمانی بۆ منداڵان به‌ڕێوه چوو.
ڕۆژی چوارشه‌ممه، 28ی 12ی 2016، به ئاماده‌بوونی هه‌ریه‌كه له عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی‌‌و ناسیح مه‌لا حه‌سه‌ن، قائمقامی قه‌زای ده‌ربه‌ندیخان‌و به‌رزان كه‌ریم، به‌ڕێوه‌به‌ری چاودێریی كۆمه‌ڵایه‌تی ده‌ربه‌ندیخان‌و به‌پرسی به‌شه‌كانی پارێزگاری خێزان‌و پلان‌و هه‌ماهه‌نگی‌‌و هۆبه‌ی توێژینه‌وه له دیوانی به‌ڕێوه‌به‌رایه‌تی گشتی، فیستیڤاڵێكی تایبه‌ت به هونه‌رو گۆڕانی‌‌و سرود بۆ منداڵانی ئاواره‌ی سوری‌‌و ئاواره‌ی عێراقی‌‌و منداڵانی ناوخۆی شاری ده‌ربه‌ندیخان له هۆڵی سه‌نته‌ری پاراستن‌و چالاكی منداڵانی ده‌ربه‌ندیخان به‌ڕێوه‌چوو.
ه‌و فیستیڤاڵه‌دا، گروپه‌كانی منداڵانی ئاواره‌‌و منداڵانی ناوخۆی شاری ده‌ربه‌ندیخان ژماره‌یه‌ك سرودو گۆرانی نیشتیمانی‌‌و په‌روه‌رده‌یی‌‌و ته‌فیهی‌‌و هونه‌ری پێشكه‌شكران‌و منداڵان به خواردنی شیرینی‌‌و پێدانی دیاریی‌‌و بینینه‌وه‌ی به‌رهه‌مه‌كانی خۆیان له وێنه‌كێشان‌و كاری هونه‌ری‌‌و كاری چنین‌و به‌رهه‌می ده‌ستی‌‌و وه‌رزشی دڵخۆشكران.
له كۆتایی فیستیڤاڵه‌كه‌دا، عومه‌ر گوڵپی قسه‌ی بۆ هه‌ردوو په‌یامنێری سپێده‌و كه‌ی ئێن ئێن كردو له لێدوانه‌كه‌یدا تیشكی خسته‌سه‌ر گرنگی ئه‌مجۆره چالاكییانه بۆ منداڵان به‌تایبه‌ت له كاتێكدا زۆرینه‌ی خوێندنگاكان ده‌رگاكانیان داخراون‌و قه‌یرانی دارایش ته‌نگی به ژیانی دامه‌زراوه‌كان هه‌ڵچنیوه، هه‌ربۆیه ده‌ستخۆشی له به‌شی پارێزگاری خێزان‌و سه‌نته‌ری پاراستنی منداڵانی ده‌ربه‌ندیخان‌و ڕێكخراوی یونسێف كرد كه به‌و چالاكییه هه‌ستابوون.
جێی ئاماژه‌یه به‌شی پارێزگاری خێزان له دیوانی به‌ڕێوه‌به‌رایه‌تی گشتی به هاوكاری ڕێكخراوی یونسێف پڕۆژه‌ی پاراستنی منداڵ بۆ ساڵی 2016 یان به‌ڕێوه‌برد‌و تیایدا زیاتر له 8000 منداڵ سودمه‌ندی ئه‌و پڕۆژه‌یه بوون له شاره‌كانی سلێمانی‌‌و ده‌ربه‌ندیخان‌و چه‌مچه‌ماڵ‌و تیایدا پشتیوانی منداڵان له ڕووی كۆمه‌ڵایه‌تی‌‌و ده‌روونی‌‌و یاسایی‌‌و داراییه‌وه ده‌كرێت.