وەزیری دارایی : پلەبەرزکردنەوە دەستپێدەکاتەوە
وەزیری دارایی هەرێمی کوردستان بڕیاری دا ڕێکارەکانی پلە بەرزکردنەوەی فەرمانبەرانی شارستانی دەستپێبکەنەوە.
بەپێی نووسراوێک کە واژۆی ئاوات شێخ جەناب، وەزیری دارایی لەسەرە، سەرجەم وەزارەت و دامودەزگاکانی هەرێمی کوردستان ڕاسپێردران کە دەستبەجێ پرۆسەی پلە بەرزکردنەوە بۆ ئەو فەرمانبەرانە دەستپێبکەنەوە کە لە سەرەتای ساڵی ۲۰۱٦ـەوە بەهۆی بارودۆخی داراییەوە ڕاگیرابوو.
لە نووسراوەکەدا ئاماژە بەوە کراوە کە پرۆسەکە سەرجەم پلەکانی (۱۰ بۆ ۱) دەگرێتەوە، بەجۆرێک پلە بەرزکردنەوەی پلەکانی ۱۰ تاكو ٤ لە دەسەڵاتی وەزارەت و فەرمانگە پەیوەندیدارەکاندا دەبێت لە ڕێگەی لیژنەی تایبەتەوە و پلەکانی ۱ و ۲ و ۳ لەلایەن وەزارەتی دارایی و ئابوورییەوە بڕیاریان لێ دەدرێت.
وەزیری دارایی مۆڵەتی تا ڕێکەوتی ۱ی تشرینی یەکەمی ۲۰۲٦ دیاری کردووە بۆ تەواوکردنی سەرجەم مامەڵە و کارگێڕییەکانی تایبەت بەم بڕیارە، بەمەبەستی جێگیرکردنی شایستە داراییەکانی فەرمانبەران لەلایەن حکومەتی فیدراڵییەوە. هەروەها جەخت کراوەتەوە کە جێبەجێکردنی ئەم هەنگاوە دەبێتە هۆی چالاککردنەوەی سەرمووچەی ساڵانەی فەرمانبەران و دابینکردنی جیاوازیی مووچە و دەرماڵەکانی ڕابردوویان.
|