حكومه‌ت‌و په‌رله‌مان به دواداچووون بۆ كه‌یسی توندوتیژی ئافره‌ته‌كه‌ی سلێمانی ده‌كه‌ن
"دۆخی ته‌ندروستی ئافره‌ته‌كه‌ی سلێمانی زۆر خراپه"
ئه‌مڕۆ شه‌ممه، 24ى 12ى 2016، هه‌ریه‌كه له گه‌شه دارا حه‌فید، سه‌رۆكی لیژنه‌ی كاروباری كۆمه‌ڵایه‌تی له په‌رله‌مان‌و عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی پاش سه‌ردانی ئه‌و ئافره‌ته‌ی كه له‌لایه‌ن هاوسه‌ره‌كه‌یه‌وه توندوتیژی به‌رانبه‌ر ئه‌نجامدرابوو، قسه‌یان بۆ كه‌ناڵه‌كانی ڕاگه‌یاندن كرد.
ئه‌و دوو به‌رپرسه‌ی حكومه‌ت‌و په‌رله‌مان له‌وته‌كه‌یاندا به ڕۆژنامه‌نووسانیان ڕاگه‌یاند ئه‌م ڕووداوه ده‌گه‌ڕێته‌وه بۆ 9ی ئه‌م ماگه‌‌و له ئه‌نجامی توندوتیژی‌‌و لێدانی به زه‌بره‌وه پیاوێك به توندی ئازاری هاوسه‌ره‌كه‌ی خۆیداوه، به داخه‌وه پاش سێ ڕۆژ له ڕووداوه‌كه گه‌یه‌نراوه‌ته نه‌خۆشخانه ئه‌وه‌ش بووه‌ته هۆی دواكه‌وتنى چاره‌سه‌رو به پێی وته‌ی پزیشكه‌كان دۆخی ته‌ندروستی قوربانییه‌كه زۆر خراپه‌‌و له حاڵه‌تی بێهۆشیدایه، هه‌روه‌ها به‌ڕێوه‌به‌رایه‌تی توندوتیژی سلێمانی‌‌و دادگای تایبه‌ت به توندوتیژییه خێزانییه‌كان سه‌رقاڵی ڕێكاری یاسایین‌و به فه‌رمانی دادوه‌ریش تۆمه‌تباره‌كه‌ی ڕاگیراوه، منداڵه‌كانیش له خانه‌كانی نه‌وجه‌وانان له به‌ڕێوه‌به‌رایه‌تی چاودێریی كۆمه‌ڵایه‌تی سلێمانی پارێزراون.
هه‌روه‌ها ئه‌و دوو به‌رپرسه په‌رله‌مانی‌‌و حكومییه دووپاتیانكرده‌وه كه داواكاری گشتیش ئاگاداری ڕووداوه‌كه‌یه‌‌و ئه‌م كه‌یسه ڕێچكه‌ی یاسایی گرتووه‌ته به‌ر‌و ئه‌وان به‌رده‌وام به دواداچوون ده‌كه‌ن تا تۆمه‌تبار به سزای یاسایی خۆی ده‌گات.
|