پیرۆزبێت له دایكبوونی په‌یامبه‌ری ئاشتی‌‌و چاكه‌ی كۆمه‌ڵایه‌تی
به‌بۆنه‌ی له دایكبوونی پێغه‌مبه‌ری پێشه‌وامان (درودی خوای له‌سه‌ر)، جوانترین پیرۆزبایی ئاراسته‌ی هه‌موو مسوڵمانانی‌جیهان‌و مسوڵمانانی كوردستان ده‌كه‌ین، له خوای گه‌وره داواكارین ئه‌م یاده گه‌وره‌یه بكاته هه‌وێنی ئاشتی‌‌و ئاشتی كۆمه‌ڵایه‌تی له كوردستان.
گرنگی ئه‌م یاده له گه‌وره‌یی ئه‌و په‌یامه‌دایه كه ئه‌و زاته خۆشه‌ویسته له‌گه‌ڵ خۆی هێنای، ئه‌و په‌یامه‌ی هانمانده‌دات كار بۆ ئاشتی بكه‌ین‌و نه‌فره‌ت له دووبه‌ره‌كی‌‌و شه‌ڕو ئاژاوه بكه‌ین، هانمانده‌دات‌و پێمانده‌ڵێت جیاوازی مرۆڤه‌كان له‌سه‌ر بنه‌مای ئاین‌و مه‌زهه‌ب، نه‌ته‌وه‌و تیره‌و هۆز، ڕه‌ش‌و سپی، پێویسته ببێته هۆی ئاشتی‌‌و ئاشتی كۆمه‌ڵایه‌تی‌‌و جوانكردنی ژیان نه‌وه‌ك به پێچه‌وانه‌وه.
پێغه‌مبه‌ری پێشه‌وا هانمانده‌دات بۆ هه‌ژاره‌كان سێبه‌رو بۆ نه‌داره‌كان پشت‌و په‌نابین، هانمانده‌دات سه‌ردانی نه‌خۆش بكه‌ین‌و سه‌لام له یه‌ك بكه‌ین‌و ده‌ستی نه‌زانه‌كان بگرین‌و یه‌كمان خۆش بوێت‌و به دوای زانستدا بگه‌ڕێین‌و باوه‌شی چاكه‌و خێر بۆ منداڵه نازداره بێ سه‌رپه‌رشته‌كان بكه‌ینه‌وه، هه‌ربۆیه پێویسته هه‌موومان له‌م یاده‌دا به كاری چاكه‌و چاكه‌ی كۆمه‌ڵایه‌تی خۆشه‌ویستی خۆمان بۆ پێغه‌مبه‌ر(درودی خوای له‌سه‌ر) ده‌رببڕین‌و به چاكه‌كاری ببینه چرا بۆ وڵات‌و گه‌لی خۆمان.
ڕاگه‌یاندنی به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی
11ی 12ی 2016
|