پارێزگاری سلێمانی پشتگیریی له كه‌مپینی پشتیوانی صندوقی هاوكاری كۆمه‌ڵایه‌تی ده‌كات
وه‌ك به‌ڵێنیدابوو، پارێزگاری سلێمانی به به‌خشینی بڕ ه پاره‌یه‌ك هاوكاری كه‌مپینی پشتیوانی له صندوقی هاوكاری سلێمانی كرد.
ڕۆژی سێشه‌ممه، 6ی 12ی 2016، به‌ڕێز كاك سه‌ردار قادر، پارێزگاری سلێمانی، وه‌ك به‌ڵێنیدابوو، له ڕێگه‌ی نوێنه‌ری خۆیه‌وه هاوكارییه‌كانی خۆی گه‌یانده صندوقی هاوكاری كۆمه‌ڵایه‌تی سلێمانی، ئه‌و بڕه هاوكاریه‌ش بریتیبوو له بڕی (1,000,000)یه‌ك ملیۆن دینار له بودجه‌ی پارێزگاو بڕی (3,000,000) سێ ملیۆن دینار له حسابی تایبه‌تی خۆی‌‌و هاوكارییه‌كه‌شی له ڕێگه‌ی نوێنه‌ری به‌ڕێزیانه‌وه گه‌یانده لیژنه‌ی وه‌رگرتنی هاوكارییه‌كان له به‌ڕێوه‌به‌رایه‌تی چاودێریی كۆمه‌ڵایه‌تی سلێمانی له گه‌ره‌كی به‌كره‌جۆ.
كه‌مپینی پشتیوانی له صندوقی هاوكاری كۆمه‌ڵایه‌تی سلێمانی له پێناو به‌رژه‌وه‌ندی ژیانی منداڵان‌و به‌ساڵاچوواندا، ڕۆژی 30ی 11 له‌لایه‌ن به‌ڕێوه‌به‌رایه‌تی گشتییه‌وه ڕاگه‌یه‌نراو بڕیاروایه بۆ ماوه‌ی 30 ڕۆژ به‌رده‌وام بێت، هاوكارییه‌كانیش له ڕێگه‌ی لیژنه‌یه‌كه‌وه ڕۆژانه پێشوازییان لێده‌كرێت‌و سه‌رجه‌م داهاتی صندوقه‌كه له كۆتایی كه‌مپینه‌كه‌دا ڕاده‌گه‌یه‌نرێت، هه‌روه‌ك صنودقی هاوكارییه‌كه به پێی ڕێنمایی دروستكراوه‌و هاوكارییه‌كان وه‌رده‌گرێت‌و هه‌ر به پێی ڕێنماییش له‌پێناو به‌رژه‌وه‌ندی خانه‌كاندا خه‌رج ده‌كرێت.
|