ڕوونكردنه‌وه‌یه‌ك له‌باره‌ی دۆسیه‌ی ئه‌شكه‌نجه‌دانی سێ مێردمنداڵه‌وه له‌سنوری پارێزگای سلێمانی:
له په‌یجی تایبه‌تی خۆی له تۆڕی كۆمه‌ڵایه‌تی فه‌یس بووك، عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی، له‌باره‌ی دۆسیه‌ی سزادانی سێ مێردمناڵه‌وه له سنوری پارێزگای سلێمانی ڕوونكردنه‌وه‌یه‌كی بڵاوكردووه‌ته‌وه كه ئه‌مه ده‌قه‌كه‌یتی:
له‌باره‌ی دۆسیه‌ی ئه‌و سێ مێردمنداڵه‌ی ڕووبه‌ڕووی ئه‌شكه‌نجه بوونه‌ته‌وه، ئه‌مشه‌و له‌گه‌ڵ به‌ڕێز وه‌زیری كارو كاروباری كۆمه‌ڵایه‌تی گفتوگۆمان كردو ئێمه وه‌ك وه‌زاره‌تی كارو كاروباری كۆمه‌ڵایه‌تی‌‌و له‌هه‌مانكاتدا به‌ڕێوه‌به‌رایه‌تی گشتی كۆمه‌ڵایه‌تی سلێمانی، به زوویی له‌و دۆسیه‌یه ده‌چینه پێش‌و هه‌موو ڕێكارێكی یاسایی ده‌گرینه‌به‌ر بۆ ڕوونبوونه‌وه‌ی ئه‌و ڕووداوه‌و پاراستنی ئه‌و مێردمنداڵانه (دوو خوشك‌و برایه‌ك)و به سزاگه‌یاندنی ئه‌و كه‌سانه‌ی به‌شداربوون له‌و كاره نامرۆڤانه‌یه‌دا‌و تۆمه‌تبارن به توندوتیژی له چوارچێوه‌ی خێزاندا، بۆ ئه‌و مه‌به‌سته‌ش له ڕێگه‌ی دادگاوه ڕێكاری پێویست ده‌گرینه‌به‌رو له‌سه‌ر تۆمه‌تباران ده‌بینه سكاڵاكار.
هه‌ربۆیه به‌ڕێز وه‌زیری كارو كاروباری كۆمه‌ڵایه‌تی فه‌رمانیدا لیژنه‌یه‌ك پێكبهێنین به سه‌رۆكایه‌تی به‌نده‌و ئه‌ندامییه‌تی به‌شه‌كانی یاساو پارێزگاری خێزان‌و لیژنه‌كه‌ش له زووترین كاتدا ده‌ست به‌كارده‌بێت.
عومه‌ر گوڵپی
به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی
30ی 11ی 2016
|