له 25ی نۆڤه‌مبه‌ردا، پابه‌ندی كارو پشتیوانی ئافره‌تانی كۆمه‌ڵگه‌كه‌مان دووپاتده‌كه‌ینه‌وه
وێنه‌كه به‌ناوی "ڕوونی"یه، كه له‌لایه‌ن بلیندا ماسون له ڕێكخراوی فرمێسكه بێده‌نگه‌كان پێشكه‌ش كراوه (له سایتی فه‌رمی نه‌ته‌وه‌یه‌كگرتووه‌كان وه‌رگیراوه)
ڕاگه‌یه‌نراوی به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی سلێمانی به‌بۆنه‌ی 25ی نۆڤه‌مبه‌ره‌وه
له بۆنه‌ی 25ی نۆڤه‌مبه‌ر، ڕۆژی جیهانی كۆتاییهێنان توندوتیژی دژی ئافره‌تان، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، پشتگیریی‌‌و پشتیوانی‌‌و به‌رده‌وامی خۆمان له‌سه‌ر ڕێگه‌ی بڵاوكردنه‌وه‌ی بیروڕاو نه‌ریت‌و ڕه‌فتاری ناتوندوتیژ به‌رانبه‌ر ئافره‌تان دووپاتده‌كه‌ینه‌وه‌و هه‌رجۆره ڕه‌فتارێكی توندو تیژی جه‌سته‌یی‌‌و ده‌روونی به‌رانبه‌ر ئافره‌تان سه‌ركۆنه ده‌كه‌ین‌و به هه‌موو ڕێگا یاساییه‌كان‌و دامه‌زراوه تایبه‌تمه‌نده‌كانمانه‌وه ڕووبه‌ڕووی ده‌بینه‌وه.
هاووڵاتیانی خۆشه‌ویست:
كۆمه‌ڵگه‌كه‌مان هه‌نگاوی ناوه له بڵاوكردنه‌وه‌ی كلتوری ناتوندوتیژی‌‌و پشتیگیری ئافره‌تان، به‌ڵام هێشتا ڕووداوو حاڵه‌تی به ئازار هه‌ن له نێو خێزان‌و خانه‌واده‌كاندا، هێشتا ئافره‌ت له كۆمه‌ڵگه‌ی ئێمه‌دا وه‌ك‌و پێویست ڕۆڵی پێ نه‌دراوه‌و وه‌ك‌و پێویست به‌شداری پرس‌و كایه جۆراوجۆره‌كانی ژیان ناكات، هێشتاش توندوتیژی له‌سه‌ر هه‌موو ئاسته‌كان به ته‌واوه‌تی تارمایی له‌سه‌ر ژیان‌و تاك‌و خێزان‌و كۆمه‌ڵگه لانه‌چووه، ئه‌م هۆكارانه‌شه واده‌كه‌ن هه‌موو تاك‌و دامه‌زراوه‌یه‌كی كۆمه‌ڵگه به حكومی‌‌و ناحكومییه‌وه ئه‌ركمان قورس بێت‌و به‌دیهێنانی كۆمه‌ڵگه‌یه‌كی خاڵی له توندوتیژی ببێته ئامانجی گه‌وره‌ی هه‌موومان، به‌ڵام نابێت ئه‌وه‌مان له بیر بچێت كوردستان‌و پێشمه‌رگه‌ی ڕۆڵه‌ی به وه‌فای، ڕۆڵێكی گه‌وره‌ی گێڕا له دوورخستنه‌وه‌ی مه‌ترسی گه‌وره‌ترین هێزی تیرۆریستی كه توندو تیژی‌‌و تۆقاندن له‌سه‌ر هه‌موو ئاسته‌كان تاكه هۆكاری كاركردنی بوو، له‌گه‌ڵ بیرهێنانه‌وه‌ی ئه‌و ڕاستییه‌ی ئه‌ركه‌كه ته‌واو نه‌بووه‌و ڕۆڵه‌كه به‌رده‌وامه تا ئه‌و كاته‌ی ئه‌و هێزه به ته‌واوه‌تی له‌ناو ده‌چێت‌و كاریگه‌رییه نه‌رێنیی‌‌و ترسێنه‌ره‌كانی له‌سه‌ر ئه‌و شوێن‌و هاووڵاتیانه‌ی كه ڕووبه‌ڕووی ئه‌م هێزه تۆقێنه‌ره بوونه‌وه‌‌و كه‌وتنه ژێر ده‌ستیان‌و بوونه قوربانی توندوتیژییه‌كان به ته‌واوه‌تی ده‌سڕێنه‌وه، به‌تایبه‌ت ڕزگاركردنی هه‌موو ئافره‌تانی ژێر ده‌ستی داعش‌و پشتگیریی‌‌و پشتیوانی هه‌مه‌لایه‌نانه‌یان پاش ڕزگاربوونیان.
ئێمه له به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی به‌شانازییه‌وه ڕایده‌گه‌یه‌نین ڕۆڵی كارمه‌ندان‌و دامه‌زراوه په‌یوه‌ندیداره‌كانمان له پشتگیریی ئافره‌تانی كۆمه‌ڵگه‌كه‌مان له سنوری پارێزگای سلێمانی‌‌و به‌تایبه‌ت پاراستنی ئه‌و ئافره‌تانه‌ی رووبه‌ڕووی هه‌ره‌شه ده‌بنه‌وه‌و پشتیگریی كردنی ده‌روونی‌‌و كۆمه‌ڵایه‌تی‌‌و ڕۆشنبیریی‌‌و یاساییان‌و چاره‌سه‌ركردنی كێشه‌كانیان‌و گه‌ڕاندنه‌وه بۆناو خێزانه‌كانیان، ڕۆڵ‌و كارێكه جێگه‌ی نرخاندنه، به‌تیبه‌ت له دۆخێكدا كارمه‌ندانمان ڕووبه‌ڕووی ته‌نگ‌و چه‌ڵه بوونه‌ته‌وه له مووچه‌و مافه‌كانیاندا، سه‌ره‌ڕای ئه‌و ته‌نگ‌و چه‌ڵه‌مه‌یه‌ش ماڵی داڵده‌دانی ئافره‌تانی هه‌ڕه‌شه‌لێكراو سه‌ر به به‌ڕێوه‌به‌رایه‌تی گشتیمان توانیویه‌تی له ماوه‌ی یه‌ك ساڵی ڕابردوودا توانیویه‌تی پێشوازی له (148) كه‌یسی جۆراوجۆری توندوتیژی ئافره‌تان بكات‌و سه‌ره‌ڕا داڵده‌دان خزمه‌تی پێویستی كۆمه‌ڵایه‌تی‌‌و ده‌روونی‌‌و تهندروستیو یاساییان بۆ بره‌خسێنێت‌و به‌هاوكاری ده‌زگاو ڕێكخراوه هاوكاره‌كان كێشه‌كانیان بۆ چاره‌سه‌ر بكات، ئه‌مه سه‌ره‌ڕای چه‌ندین چالاكی تر‌و راهێنانی جۆراو جۆر كه ده‌چنه بواری به‌هێزكردنی ئافره‌تان‌و پشتگیریی كردنیان له هه‌موو ڕووه‌كانی ژیانه‌وه.
له كۆتاییشدا دووپاتیده‌كه‌ینه‌وه، كۆمه‌ڵگه‌ی باش‌و وڵاتی به‌هێز له سایه‌ی دۆخێكدا دێته دی كه پڕبێت له ئاشتی‌‌و ئاشتی كۆمه‌ڵایه‌تی‌‌و نه‌بوونی هه‌ستی په‌راوێزخستن‌و ڕۆڵپێدانی تاك‌و جیاكاری له‌سه‌ر بنه‌مای ڕه‌گه‌زی، له دۆخێكدا دێته‌دی ڕێزگرتن له كلتور‌و نه‌ریتی باش‌و پێشكه‌وتو و ئاینی تاك‌و كۆمه‌ڵ‌و جیاوازییه‌كان‌و سه‌روه‌ری یاسا ماكی كار بێت، پێویسته هه‌مووشمان به خه‌ڵك‌و حكومه‌ته‌وه به‌و ئاراسته‌یه كاربكه‌ین.
ڕاگه‌یاندنی به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له‌پارێزگای سلێمانی
25ی 11ی 2016