به‌پێی سیستمی دایه‌نگه‌كان، ژماره (7)ی ساڵی 2013ی ئه‌نجومه‌نی وه‌زیران، ئه‌و كه‌سانه‌ی ئه‌ركی به‌ڕێوه‌به‌ری دایه‌نگه‌یان ئه‌كه‌وێته ئه‌ستۆ پێویسته به‌لایه‌نی كه‌مه‌وه ده‌رچووی زانكۆبن‌و شاره‌زاییان هه‌بێت له بواره‌كه‌ی خۆیاندا، به‌ڕێوه‌به‌رایه‌تی گشتیش ئه‌م بڕگه‌یه به‌سه‌ر هه‌موو دایه‌نگه‌كاندا جێ به‌جێده‌كات چ دایه‌نگه حكومییه‌كان چ دایه‌نگه ناحكومییه‌كان.
به‌پێی پاشكۆی كۆنووسی ژماره‌ی (1)ی ساڵی 2016ی كۆبوونه‌وه‌ی هاوبه‌شی به‌ڕێوه‌به‌رایه‌تی گشتی‌‌و به‌ڕێوه‌به‌ری دایه‌نگه‌كان، پێویسته به‌ڕێوه‌به‌ری دایه‌نگه‌كان به‌لایه‌نی كه‌مه‌وه هه‌ڵگری بڕوانامه‌ی زانكۆ بن‌و شاره‌زابن له بواره‌كه‌ی خۆیاندا، به‌ڕێوه‌به‌رایه‌تی گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانیش بۆ جێ به‌جێكردنی ئه‌م بڕگه‌یه رۆژی 1ی 1ی 2017 وه‌ك كۆتا واده ده‌دات به دایه‌نگه ناحكومییه‌كان‌و له دوای ئه‌و به‌رواره‌وه هه‌ر دایه‌نگه‌یه‌ك هه‌ر بڕگه‌یه‌كی له سیستم‌و ڕێنماییه‌كانی دایه‌نگه‌و بڕیاره‌كانی به‌ڕێوه‌به‌رایه‌تی گشتی جێ به‌جێ نه‌كردبێت خۆی به‌رپرسیاره له هه‌ر لێپێچینه‌وه‌یه‌ك به‌رانبه‌ری ده‌گیرێته به‌ر.
له سیستمه‌كه‌دا به‌مجۆره باس له به‌ڕێوه‌به‌ری دایه‌نگه‌و ئه‌ركه‌كانی ده‌كات:
به‌ڕێوه‌به‌ری دایه‌نگه: مه‌رجه به‌لایه‌نی كه‌مه‌وه ده‌رچووی زانكۆ ( هه‌ڵگری بڕوانامه‌ی به‌كالۆریۆس ) بێت، خاوه‌نی شاره‌زایی‌‌و ئه‌زموون بێت له‌و بواره‌دا، ئه‌ركه‌كانی بریتین له‌مانه‌ی خواره‌وه:
أ. وه‌رگرتنی منداڵ.
ب. سه‌رپه‌رشتی‌‌و چاودێریی به‌رنامه‌كانی دایه‌نگه.
ج. ئاراسته‌كردنی كارمه‌ندان.
د. سه‌رپه‌رشتیكردنی تۆمارو دۆسییه‌‌و تۆماری منداڵان.
ه. ئه‌نجامدانی چاوپێكه‌وتن له‌گه‌ڵ دایكان‌و باوكانی منداڵ.
و. ڕێكخستنی ڕاپۆرته‌كانی دایه‌نگه له‌باره‌ی چۆنییه‌تی به‌ڕێوه‌چوونی كاره‌كانی دایه‌نگه‌وه هه‌ر سێ مانگ جارێك.